Anëtari i Kryesisë së PD, Belind Këlliçi, ka denoncuar nëpërmjet një statusi në “FB” shqetësimin e banorëve të Kasharit në Tiranë. Bëhet fjalë për “shpronësimin qesharak” që po u bëhet banorëve të kryeqytetit nga Bashkia.
Një metër katror tokë kompensohet në vlerën e një gjysmë kilogrami djathë, shkruan Këlliçi.
“Një situatë skandaloze dhe absurde po ndodh në Kashar. Dyshja Veliaj – Salillari shpronësojnë banorët me çmim qesharak, një metër katror më pak se gjysëm kilogram djathë. Bashkia dhe qeveria kanë vlerësuar çmimin për metrin katror të tokave me 448 lekë të reja ose 4 mijë e 400 qind e 80 lekë të vjetra. E më shqetësuese është fakti se VKM për shpronësimin e tokave të banorëve të Kasharit është miratuar dy ditë pas rizgjedhjes së Erion Veliaj si kryebashkiak i Tiranës në zgjedhjet e vjedhura të 14 Majit. Edhe pse pronarët kanë dokumentacion të rregullt të pronësisë së tyre dhe kanë prova të qarta të trashëgimisë së tokave, bashkia dhe qeveria po i shpronësojnë pa kompensimin përkatës. Është absurde që ata nuk kanë pasur asnjë takim me asnjë përfaqësues të Bashkisë për të diskutuar kompensimin dhe punimet kanë nisur pa konsultuar pronarët”, shprehet Këlliçi.
“Deri më tani, asnje pronar nuk është njoftuar për procesin e shpronësimit dhe hipotekat janë bllokuar për një vit, duke ndaluar banorët të blejnë ose të shesin tokën e tyre. Ky projekt i shpronësimit thonë banorët nuk është asgjë më shumë se një mashtrim dhe çështja duhet të zgjidhet me drejtësi dhe respekt ndaj pronarëve të tokave të Kasharit. Banorët kërkojnë transparencë dhe drejtësi për këtë çështje dhe ndihmën e organeve kompetente për të zgjidhur këtë situatë absurde, nga e cila ata pretendojnë gjithashtu se biznesmeni Pëllumb Salillari ka marë një tender 3.8 miliardë lekë nga Erion Veliaj”, shton ai.
