Policia ka arrestuar 4 persona në Lushnje të cilët akuzohen për veprën penale “kultivim i lëndëve narkotike”.
Babë e bir dhe dy të afër të tyre kanë rënë në pranga në Lushnjë, pasi kishin kultivuar kanabis. Konkretisht janë arrestuar Hyqmet Gjolena, 61 vjeç, dhe Mariglen Gjolena, 34 vjeç, të dy babë e bir, si edhe dy të afërmit e tyre Fitim Gjolena, 24 vjeç, Ervin Gjolena, 31 vjeç.
Në kuadër të operacionit të uniformave blu, gjatë kontrolleve në territorin e fshatit Murrizë, Lushnjë në një pronë publike, u gjetën të kultivuara 87 bimë narkotike cannabis sativa, të cilat policia bën me dije se në përfundim të veprimeve procedurale, u asgjësuan nëpërmjet djegies.
“Si bashkëpunëtorë të dyshuar për kultivimin e këtyre bimëve, u identifikuan, u kapën dhe u vunë në pranga shtetasit F. Gj., 24 vjeç, E. GJ., 31 vjeç, H. Gj., 61 vjeç dhe M. Gj., 34 vjeç, të katërt banues në fshatin Biçakaj, Lushnjë (të afërm të njëri-tjetrit, ndërsa shtetasit H. Gj. dhe M. Gj., babë e bir)”, thuhet ne njoftimin e policisë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
