Nga BoldNews.al
Vendimmarrjet e Pirro Vengut, drejtori i Autoritetit Portual të Durrësit, janë kthyer në qesharake. Kohët e fundit, Vengu ka hapur “thesin” e parave publike, duke bërë një mori tenderësh për mirëmbajtjen. Madje, afatet i vendos 3 vjeçare, duke lënë vend për shumë abuzim.
Nga njëra anë paratë publike dhe nga ana tjetër prona publike, e cila i është dhënë arabëve, për të ndërtuar pallate, hotele shumë katëshe në gjithë territorin ku shtrihet aktualisht Porti i Durrësit. Arabët kanë ngritur edhe një zyrë shitjesh shumë pranë godinës qendrës të APD-së, ku çdo ditë priten dhe përcillen dhjetëra klientë. Janë shitur disa kulla, teksa çmimi për metër katror ka kapur majat. Por, nga njëra anë para private dhe nga ana tjetër para publike, ku Vengu ka vijuar të shpërdorojë partë.
Sipas dokumenteve që disponon redaksia e BoldNews.al, Autoriteti Portual Durrës ka hapur një tender ditët e fundit me objekt “mirëmbajtje gjelbërim për 3 vite”. Fondi limit i kësaj procedure është 11.865.651 lekë, pa TVSH. Ose me TVSH, shuma shkon në rreth 120 mijë euro. Por lexoni pak me kujdes afatin; 3 vite! Zarfet e këtij tenderi do të hapen në datën 14 shtator, teksa fituesi do të ketë detyrë që të gjelbërojë të gjithë sipërfaqen, tashmë të dhënë për arabët.
Por nëse i është dhënë atyre, madje pritet të fillojnë nga java në javë ndërtimi i kullës së parë, çfarë sipërfaqeje gjelbërimi do të mirëmbajë Vengu? Lulishtet e Alabarit apo të APD-së? Në vend që shteti shqiptar të investojë urgjentisht për një port të ri, drejtori i APD-së bën tender mirëmbajtje të sipërfaqeje private! Një paradoks i madh, pasi në këtë mënyrë shpërdorohen paratë. Dhe kontratat bëhen 3 vjeçare me qëllim që të fryhet edhe buxheti, pasi në këtë mënyrë do të ketë para’ për të gjithë.
Investigimi i BoldNews.al i para disa muajve për tenderët e mirëmbajtjes së APD-së:
Skandali/ Piro Vengu bën tendera për mirëmbajtjen e Portit, privatët shesin apartamente
Disa muaj më parë, BoldNews.al investigoi tenderët e APD-së, ku “territori i Portit të Durrësit është kthyer në një ‘lavatriçe’ të madhe parash, ku nga njëra anë drejtori i Autoritetit Portual të Durrësit, Pirro Vengu, bën tendera mirëmbajtje me afat 3-vjeçar dhe nga ana tjetër firma private ka filluar të shesë njësi shërbimi”.
Vengu po mundohet të zhvasë edhe qindarkat e fundit, duke bërë tendera me afate të gjata, kur e di shumë mirë se eprorja e tij direkte, Belinda Balluku, ka firmosur marrëveshjen me Mohamed Ali Alabbar. Në faqen e internetit, të vetë kësaj firme shkruhet se “projekti ‘Durrës Yachts & Marina’ drejtohet nga Grupi i Shoqërive ‘Eagle Hills’, ku Mohamed Alabbar është kryetari i Grupit”.
Sipas dokumenteve që disponon BoldNews.al, Autoriteti Portual i Durrësit ka hapur një tender me objekt ‘mirëmbajtja e aseteve elektronergjitike (3 vite)’. Pra, me kohëzgjatja të kontratës prej 36 muajsh! Në tender kanë marrë pjesë disa firma, ku në fund ka fituar shoqëria ‘HTM’ shpk. Në të njëjtin dokument shkruhet se vlera e ofertës së këtij autoriteti është 85.348.800 lekë, pa TVSH”, shkruante BoldNews.al.
