Nga Boldnews.al
Kur Struktura e Posaçme Anti-Korrupsion (SPAK), nisi historinë e sekuestrimit të inceneratorëve, qeveria risolli “nga pensioni” administratorin e hershëm, Farudin Arapi.
Dikur menaxher i firmave piramidale, Arapit iu ngarkua menaxhimi i kompanive “Integrated Technology Service” të Klodian Zotos dhe shoqëritë që rridhnin prej saj, koncesionarin “Albtek Energy” të inceneratorit të Elbasanit dhe koncesionarin “Integrated Technology Waste Treatment” të inceneratorit të Fierit.
Farudin Arapit iu ngarkua edhe përgjegjësia për të mbrojtur aferën e inceneratorëve, duke u shprehur publikisht konsiderata të larta për këto investime abuzive të qeverisë.
Por, tashmë, dy vjet pasi iu ngarkua “barra” për të mbrojtur inceneratorët, edhe Farudin Arapi doli jashtë loje.
Prej fillimit të Gushtit 2023, Arapi është larguar si administrator nga të gjitha kompanitë e sekuestruara. Jo vetëm atyre të inceneratorëve, por ai është larguar edhe nga administrimi i “Ora News”.
“Boldnews.al” mësoi se ai ka pasur përplasje të ashpra me titullarët e tij të Agjencisë së Pronave të Sekuestruara, si edhe me Ministrinë e Infrastrukturës, e cila është autoriteti kontraktor për kompanitë e impianteve të përpunimit të mbetjeve në Elbasan, Fier dhe Tiranë.
Një informacion, gjithësesi i pakonfirmuar, thotë se Farudin Arapi jo vetëm që ka dhënë dorëheqjen nga pozicioni në kompanitë e sekuestruara, por ka dorëzuar një kallëzim penal në SPAK për disa zyrtarë të lartë qeveritarë e lokalë, për shkak të problematikave që ka konstatuar, sidomos gjatë administrimit të inceneratorit Fier.
Megjithatë, informacioni për kallëzimin penal mbetet ende në kuadrin e zërave të pakonfirmuar.
Por, ajo që është e vërtetë dhe që pranohet nga vetë Arapi, është fakti se mes tij dhe strukturave të tjera ka pasur përplasje dhe se ai është detyruar të marrë lejen, para se të kryejë shkëputjet përfundimtare nga detyra.
Diçka të tillë e ka pranuar vetë Arapi, në një komunikim telefonik me “Boldnews.al”.
Ai deklaroi se ka dhënë dorëheqjen nga administrimi i kompanive “për shkak të mospërmbushjeve të disa kushteve dhe kritereve që kisha kërkuar për realizimin e detyrës që më ishte ngarkuar”.
I pyetur se me kë i kishte pasur këto mosmarrëveshje, Farudin Arapi nuk pranoi të jepte komente më të zgjeruara.
Po ashtu, ai nuk pranoi as pyetjen nëse kishte dorëzuar kallëzim penal për zyrtarë të lartë shtetërorë e lokalë, sidomos në Fier. “Ju lutem, jam me pushime dhe më pas do të bëj dorëzimet”, u shpreh shkurt Farudin Arapi, i cili gjithësesi pranoi se nuk ishte larguar qetësisht.
“Po, u largova për shkak të mosmarrëveshjeje”, deklaroi prerë ai, pa shpjeguar natyrën e tyre.
