Partizani do të luajë ndaj Astanës sfidën e kthimit të “Play-Off” në “Elbasan Arena”. Një duel mjaft i rëndësishëm dhe delikat ku demat do të synojnë të kualifikohen në grupet e Conference League.
Të kuqtë duhet të përmbysin rezultatin e sfidës së parë, ku u mposhtën në Kazakistan me shifrat 0-1. Gjithsesi nuk do të jetë aspak e lehtë, pasi dëmtimet janë kthyer në makth te kryeqytetasit.
Adnard Mehmeti ka pësuar një dëmtim në stërvitjet e fundit dhe në këtë mënyrë e ka të pamundur të jetë i gatshëm për të zbritur në fushën e lojës. Një dëmtim muskulor që bën me “dhimbje koke” Zoran Zekic, i cili duhet të bëjë llogaritë pa një prej titullarëve.
Në këtë situatë blerja e merkatos së verës, për të cilin Partizani shpenzoi 100 mijë euro ka lënë në “baltë” të kuqtë për duelin me Astanën. Në vend të tij trajneri kroat do të rreshtojë njërin prej Murataj ose Bilalit.
