Nga Boldnews.al
Ngjarja e rëndë e përplasjes së dy të miturve me Jet-Ski në Llaman të Himarës, në datën 15 gusht 2023, u rëndua më shumë edhe nga veprimet e Policisë së Vlorës, e cila shpërndau informacione të pasakta, nën dyshimin se ka vepruar qëllimisht në këtë mënyrë.
Nëse “skandali” do të mbetej thjesht tek njoftimi “i pasaktë”, gjithçka mund të dukej si pakujdesi nga dinamika e ngjarjes së rëndë të ndodhur në det.
Por, efektivët blu të Vlorës u treguan shumë “tolerant” edhe me pronarin e Jet-Ski-ve, Renato Panajoti, i cili në kundërshtim flagrant me ligjin, u dorëzoi dy mjetet e fuqishme të ujit disa adoleshentëve 15-16 vjeçarë, të cilët nuk kishin as patentë dhe as përvojën e duhur në përdorimin e tyre.
Rezultati? Dy mjetet motorike u përplasën me njëri-tjetrin, me pasojë plagosjen e rëndë të të miturit K.XH nga Tirana, i cili fatkeqësisht ndërroi jetë në Spitalin e Traumës, pak ditë pas aksidentit fatal.
“Çoroditja” e Policisë
Pasditen e 15 Gushtit 2023, Policia shpërndau këtë njoftim:
“Në Llaman, shtetasit D. K. dhe K. Xh., janë afruar te disa shkëmbinj dhe pasi kanë zbritur nga mjeti lundrues Jet Ski, kanë hipur në shkëmbinj, për t’u hedhur në det.
Shtetasi K. Xh., 16 vjeç, banues në Tiranë, kur është hedhur në det, ka pësuar dëmtime të rënda në fytyrë dhe në kokë, për shkak se ka rënë afër shkëmbit. Në këtë moment është hedhur në det edhe shoku i tij, shtetasi D. K., 17 vjeç, banues në Tiranë, për ta ndihmuar, por nuk ka mundur dot sepse është dëmtuar edhe ai vetë….”.
Pra, në njoftimin paraprak, Policia deklaroi se incidenti kishte ndodhur pas hedhjes së të rinjve nga shkëmbi.
Por, në një njoftim të dytë, disa orë pas të parit, Policia dha një version tërësisht të ndryshëm:
“Në Llaman, shtetasit K. Xh. dhe D. K., së bashku me shtetasit U. K. dhe R. P., 17 vjeç, nga Tirana (të katërt shokë me njëri-tjetrin) janë futur në det, me 2 mjete lundruese Jet Ski. Gjatë manovrave në det, dyshohet se aksidentalisht dy mjetet lundruese janë përplasur me njëra – tjetrën dhe për pasojë janë dëmtuar drejtuesi i njërit mjet Jet Ski, shtetasi K. Xh. dhe pasagjeri, shtetasi D. K. Shtetasi K. Xh., u transportua në Tiranë, për ndihmë mjekësore më të specializuar”.
Variant i dytë flet për përplasje mes dy mjeteve motorike dhe jo për hedhje nga shkëmbi.
Policia e Vlorës u justifikua me faktin se dëshmitë kontradiktore ishin dhënë nga dy të miturit e tjerë, të cilët ishin të tronditur nga ngjarja.
Është e paqartë se përse Policia nxitoi të shpërndante një informacion “të pasaktë”. Ndoshta për të ruajtur “imazhin” e një Policie që kujdeset dhe monitoron mjetet motorike detare dhe një ngjarje e tillë e rëndë do të cënonte performancën?
Gjithësesi, e vërteta e ngjarjes u sqarua nga vetë Policia, ndoshta nën ndikimin e dëshmive të qytetarëve të tjerë, të cilët kishin parë përplasjen mes dy Jet-Ski-ve.
Pasi policia u “sqarua” për shkakun e aksidentit, kreu një vizitë inspektuese tek pika e dhënies me qera të motorëve të ujit, të menaxhuar nga Renato Panajoti.
Sipas të dhënave të siguruara nga “Boldnews.al” nga dëshmitarët në vendngjarje, rezulton se fillimisht, Policia kishte inspektuar dy mjete motorike, të cilat nuk kishin asnjë dëmtim. Në bazë të kësaj kqyrjeje paraprake, u ndërtua edhe njoftimi i parë policor, mbi bazën e të cilit incidenti kishte ndodhur për shkak të hedhjes nga shkëmbinjtë.
Pasi ngjarja mori përmasa të mëdha, Policia e Vlorës “u detyrua” të paraqitet sërish tek pika Jet-Skive të Panajotit, ku, kësaj radhe, konstatoi mjetin e dëmtuar rëndë, i cili ishte përfshirë në përplasjen në det.
Por, megjithëse u zbulua e vërteta, si edhe u konstatua se pronari i Jet-Skive kishte shkelur ligjin, duke u vënë në dispozicion mjetet e fuqishme detare disa të miturve, të cilët nuk kishin as patentë për shkak të moshës, Policia e Vlorës nuk veproi me arrestim në flagrancë apo ndalim të biznesmenit.
Në njoftimin përfundimtar të Policisë për ngjarjen thuhet se “filloi procedimin penal për shtetasin R. P., (Renato Panajoti) 56 vjeç, pronari i mjeteve lundruese Jet Ski, për veprën penale “Shkelja e rregullave teknike në punë”.
Për ngjarjen tragjike, aktualisht nuk ka asnjë të arrestuar. Fillimisht, Policia referoi materialet në Prokurorinë e Vlorës për hetimin në gjendje të lirë ndaj të miturit tjetër të përfshirë në këtë ngjarje, D.K., për veprën penale të “plagosjes së rëndë nga pakujdesia”.
Rasti hetimor pritet t’i kalojë për shqyrtim seksionit të të miturve në Prokurorinë e Vlorës dhe, me shumë mundësi, ngjarja do të kualifikohet “vrasje nga pakujdesia”, pas humbjes së jetës së të aksidentuarit K.Xh..
