Shtimi i sigurisë fizike për kreun e SPAK, Altin Dumani është bërë me iniciativë të policisë së shtetit, tha sot ministri i Brendshëm, Taulant Balla.
I pyetur nga mediat nëse në drejtim të krteut të Strukturës së Posaçme antikorrupsion ka pasur kërcënime, Balla tha se ishte ai vetë që ka komunikuar me drejtorin e Policisë së Shtetit për të vendosur kontakte me Dumanin në mënyrë që nga Policia e Shtetit të ofrohet siguri maksimale.
“E vërteta është: dua të garantoj që jo vetëm prokurorët, gjyqtarë por edhe qytetarët që policia e shtetit është në detyrë për të garantuar që çdokush të jetë i sigurt. Kam komunikuar me drejtorin e Policisë së Shtetit dhe i kam kërkuar që të marrë kontakt me Dumanin, për të garantuar që policia e shtetit të bëjë detyrë. Kemi përgjegjësi që të garantojmë sigurinë maksimale për çdo zyrtar….”, tha Ballanë një dalje për mediat për komunikimin e vendimeve të marra nga qeveria në mbledhjen e sotme.
Balla theksoi, se me aq sa ishte i informuar ai për çështjen, nuk ka pasur asnjë kërkesë nga ana e SPAK, që drejtuesit të saj t’i shtohet siguria fizike.
Ndërkohë, në një reagim të bërë më herët gjatë ditës, SPAK bëri të ditur se mbrojtja e Drejtuesit të Prokurorisë është marrë “konform procedurave standarde të miratuara.”
