Presidentja Kosovës, Vjosa Osmani, ka akuzuar Serbinë se po fsheh arkivat për gjetjen e personave të zhdukur me dhunë. Pas homazheve pranë memorialit për të zhdukurit, Osmani u shpreh se Serbia s’po e respekton marrëveshjen e arritur për hapjen e arkivave. Ajo i bëri thirrje komunitetit ndërkombëtar që të dënojë këtë qasje të Serbisë.
“Shpresojmë që dialogu në Bruksel nuk do të jetë më një proces përmes të cilit Kosovës do t’i bëhet trysni dhe popullit të Kosovës padrejtësi, ndërkaq fytyra e Vuçiçit, një njeriu që ende fle mbi varreza masive, do të vazhdojë të shpërlahet padrejtësisht”, tha ajo.
Krahas kësaj, Osmani tha se janë përmbushur zotimet për përmbushjen e marrëveshjes së Bratillsavës, ndërkohë që u shpreh se pret që pas takimit të shtatorit të largohen masat ndëshkuese të BE-së ndaj Kosovës.
Presidentja e Kosovës, Vjosa Osmani bashkë me kryetarin e Kuvendit, Glauk Konjufca dhe zyrtarë qeveritarë kanë bërë homazhe pranë përmendores dedikuar personave të zhdukur me dhunë gjatë luftës, me rastin e shënimit të Ditës ndërkombëtare të personave të zhdukur me dhunë gjatë luftës në Kosovë.
Më shumë se dy dekada pas përfundimit të luftës, në Kosovë vazhdojnë të mungojnë edhe mbi 1600 persona, të zhdukur me dhunë.
