Partia Demokratike i bëri apel publik këtë të Shtunë Prokurorisë së Posaçme të hetojë Bashkinë e Durrësit dhe kryetaren e saj Emiriana Sako.
PD ngre dyshime për shkelje ligjore në dy procedura prokurimi të realizuar nga ky institucion, të lidhura me kompaninë e Mirel Mërtirit dhe Klodian Zotos, të pagëzuar si bosët e inceneratorëve.
Sipas PD, Bashkia Durrës më 27 shtator 2021, në një tender pa garë, shpalli fituese kompaninë INTEGRATED ENERGY BV SPV (pas së cilës sipas hetimeve të SPAK për inceneratorët pronarë de facto janë Mirel Mërtiri dhe Klodian Zoto).
Referuar të dhënave në Agjencinë e Prokurimeve Publike, Zoto e Mërtiri arkëtuan nga Bashkia Durrës 1.126 miliard lekë të reja pa tvsh, në tenderin me objekt “depozitim i mbetjeve urbane”, lidhur më 8 Tetor 2021.
Ish-deputeti demokrat Klevis Balliu nga selia blu, tha se nga 14 Dhjetor 2021 deri më 17 Gusht 2023, bashkia Durrës pagoi te “Integrated Energy BV spv” një vlerë prej 7.05 miliard lekë për depozitimin e mbetjeve.
Por ai sjell në vëmendje se pak javë pas nënshkrimit të kontratës me kompaninë e Zotos e Mërtirit, që ka një afat me afat 48 muaj, Bashkia Durrës lidh një kontratë të dytë me të njëjtin objekt: “depozitim i mbetjeve urbane”, me të njëjtën kompani. Balliu thotë se për kontratën e dytë “nuk kemi gjetur asnjë të dhënë lidhur me procedurën e ndjekur dhe dokumentacionin shoqërues të saj”.
Në këto kushte, ai ngre pyetjet:
- Përse është lidhur një kontratë e dytë me të njëjtin objekt, ndërkohë që ekziston kontrata fillestare në fuqi me afat 48 muaj?
- Si u planifikua buxheti për këtë kontratë të dytë? Si u miratua? Çfarë procedure u ndoq deri në lidhjen e kontratës 101/81 me 28 tetor 2022?
- Përse vijojnë pagesat për këtë kompani e cila është dëshmuar se operon në kushte mashtrimi dhe është nën hetim?
Ish deputeti thotë se është i pakuptueshëm, dashakeq, antiligjor, në përbuzje të djersës së taksapaguesve shqiptarë fakti që Ministria e Financave vazhdon edhe sot të bëjë pagesa nga Thesari i Shtetit te kompanitë e Zotos e Mërtirit.
Sipas tij, ato duhen ndërprerë menjëherë.
“I bëjmë thirrje SPAK-ut që të thellojë hetimin dhe në bashkinë Durrës për të verifikuar këto procedura, dhe për të ndërprerë këto pagesa të cilat, nuk shkojnë për shërbime publike, por mbajnë të sigurt dhe në luks të arratisurit e çështjes dhe padronët e tyre në Tiranë”, përfundon Balliu.
