Kremlini ka hedhur poshtë të premten pretendimet se kreu i grupit Wagner mund të jetë vrarë me urdhër të Rusisë.
Sipas Moskës zyrtare, bëhet fjalë për një “gënjeshtër absolute”, teksa refuzohet po ashtu që të konfirmohet vdekja e Yevgeny Prigozhin.
Në një reagim, zëdhënësi i Kremlinit Dmitry Peskov u shpreh: “Po qarkullojnë spekulime rreth përplasjes së aeroplanit dhe për vdekjen tragjike të pasagjerëve të aeroplanit, duke përfshirë Yevgeny Prigozhin. Sigurisht, në Perëndim, i gjithë spekulimi po prezantohet nga një kënd i njohur. E gjithë kjo është një gënjeshtër absolute, dhe këtu, kur e trajtojmë këtë çështje, duhet të bazoheni në fakte. Nuk ka ende shumë fakte. Ato duhet të vërtetohen gjatë veprimeve hetimore.”
Peskov tha se për rrëzimin e mjetit fluturues ka nisur një hetim, duke shtuar se presidenti rus nuk e kishte takuar Prigozhin kohët e fundit.
Ai tha gjithashtu se ishte e pamundur të thuhej nëse Putin do të merrte pjesë në funeralin e kreut të Wagner.
Kujtojmë se mercenarët e Wagner-it u përpoqën në qershor që të marshonin drejt Moskës në një rebelim që synonte të dëbonte rivalët e Prigozhin në strukturën e mbrojtjes. Megjithatë, rebelimi më pas u cilësua nga Putin si një “thikë pas shpine” e pabesë.
