Shembja e banesave për “interesin publik” ka rezultuar prej vitesh një dramë për shumë familje, banesat e të cilëve janë rrënuar nga bulodozerat e pushtetit.
Prarojë e kësaj procedure ndërtim-shkatërrimi kanë qenë uniformat e policisë që nuk kanë ngurruar të përdorin forcën kundër qytetarëve të cilët kanë kërkuar kryesisht një shpronësim të drejtë – me vlerën e tregut.
Rast i fundit vjen nga zona pranë Rinasit, ku banesa e Besim Karrukës planifikohet të shembet për shkak të projektit të rrugës Thumanë-Kashar.
Pamjet e transmetuara në media këtë të premte treguan se si efektivë me uniformë ushtrojnë forcë për të futur në fugonin e policisë një të moshuar. Madje nuk kursehen as me fëmijët.
Djali i Besim Karrukës, në një prononcim për “JOQ” tregoi se i ati është invalid dhe këtë fakt ia ka transmetuar edhe efektivëve të Fushë-Krujës. Por, siç tregon ai, dhuna e tyre është e vazhdueshme.
“Kjo po zgjat gati dy javë, janë forcat e komisariatit të fushë krujës në bashkëpunim me të Tiranës vijnë dhe dhunojnë familjen time prindërit e mi sidomos këtu në pronën e tyre”, tha djali i të moshuarit.
“Sot ka qenë një dhunë tjetër, kanë keqtrajtuar babain tim që është invalid me dy proteza, tek pjesa e kofshave dhe duke e marrë zvarrë nëpër gurishte për ta shoqëruar në komisariat. Kanë sjellë nipërit vajat motrat mamaja që se kanë lënë, nuk e di se ça do bëhet kështu. Para tre ditësh ka qenë i njëjti rast dhe kam qenë vetë prezent dhe unë ja kam konfirmuar policëve të Fushë-Krujës që babai im ka qenë invalid. Ka qenë tension jashtëzakonisht i madh. Ndërsa sot, të Tiranës u shtangën sepse nuk dinin gjë kurse të Fushë Krujës bënë prapë të njëjtën procedurë. Rruga kalon shumë pranë shtëpisë. Nuk është bërë shpronësimi, s’kemi lënë kërkesa dhe denoncime pa bërë”, shton ai.
