Ish-deputeti demokrat Lefter Maliqi nëpërmjet një njoftimi për mediat, bën me dije se llogaria e tij në rrjetin social Facebook është hakeruar.
Maliqi shprehet se kjo ka ndodhur pas denoncimeve të njëpasnjëshme që ai ka publikuar për blerjen e votave në zgjedhjet e 14 Majit nga kryebashkiaku i Kuçovës, Kreshnik Hajdari dhe oligarku Pëllumb Salillari.
Sipas kandidatit të “Bashkë Fitojmë” për Kuçovën në zgjedhjet lokale, hakera janë paguar me paratë e korrupsionit.
Maliqi akuzon Hajdarin dhe Salillarin se ky akt është bërë prej tyre për ta privuar atë nga denoncimet me fakte e prova për grabitjen e pasurisë publike dhe abuzimin me paratë e taksapaguesve.
“Denoncimet e perditëshme ndaj grabitjes së mandatit të Bashkisë Kuçovë, kundër ish-fatorinos, Oligarkut Salillari dhe ‘pengut’ të tij Hajdarit të Kuçovës. Denoncimet për tenderat korruptivë, abuzimet me taksat e qytetarëve, vjedhjet, kallëzimet në “SPAK”, kundër kësaj mafie lokale e qeveritare, bënë që të paguajnë hakerat për të më mbyllur gojën.
Gabojnë pasi nuk ka forcë që më ndal në luftën time, kundër kësaj mafie që po pi gjakun shqiptarëve, që tjetërsojnë votat, abuzojnë dhe pasurohen me paratë e shqiptarëve. Ndëshkimi ligjor ndoshta i vonuar, por do të marrin ndëshkimin e merituar! Beteja ligjore, politike dhe mediatike ndaj kësaj mafie nuk do të ndalet!”, shprehet Maliqi.
