Situata është shfaqur problematike me Kadastrën pas implementimit të “reforma digjitale” në institucion. Nga vetë drejtuesja e Kadastrës Dallandyshe Bici, por dhe kryeministri Edi Rama u tha se me këtë reformë do të shmangej korrupsioni në institucion.
Por siç ka raportuar Boldnews në një artikull së fundmi, kjo jo vetëm që nuk ka ndodhur, por sistemi jo funksional po shkakton vonesa të zgjatura për qytetarët, të cilët nuk po marrin shërbime nga institucioni shtetëror që ka për detyrë ti ofrojë.
Situata problematike ka marrë vëmendje mediatike dhe kjo duket se nuk i ka pëlqyer drejtoreshës së Kadastrës Bici, e cila pretendon se po sulmohet.
Në një postim në “FB”, ajo pretendon se “mitmarrja dhe korrupsioni nuk janë fjala e ditës”, ndërsa kërcënon edhe noterët.
“Pse kërkojnë të gjithë me ngulm dështimin e kadastrës?! U bë kaq javë që Kadastra është nën sulme të vazhdueshme. Nga grupe interesi që hapur, apo fshehur, me arsye, apo jo, bëjnë çmos të përlyejnë fytyrën e re të ASHK, atë ku mitmarrja dhe korrupsioni nuk janë fjala e ditës, e ku zyrtarët si shumica e qytetarëve të këtij vendi duhet të presin normalisht pagën në fund të muajit, e meqë nuk janë mësuar kështu, dorëhiqen. Pse janë trazuar noterët?! Ata që për kaq vite, as nuk kanë folur ndonjëherë për vonesa, për atë stokun e aplikimeve disa vjeçare, për të drejtat e qytetarëve. Pse nisën të kenë ndenja karshi halleve të qytetarëve tani që prej disa javësh në ASHK ka nisur të proçesi i ri i punës pas riinxhinierizimit të sistemit? Mos vallë kanë humbur burimet e tyre dhe kanë mbetur si peshku në zall?! Do flasim sërish për ta. Shumë shpejt. Por pse kërkojnë dështimin e kadastrës me ngulm grupe të tjera interesi?! Çfarë kanë humbur? Pse vallë nuk kërkohet edhe qëndrimi i ASHK për lajme të ndryshme, akuza, pretendime”, shkruan.
Më tej, pranon se ka vonesa, ngërç, flet për sabotime, por thotë se nuk ka dështim.
“Unë nuk i kam shmangur kurrë sfidat. Dhe kjo që po ndodh sot në ASHK, është një ndryshim epokal për këtë institucion. Por ky ndryshim do të ruajë xhepat e qytetarëve, duke mos i zbrazur tek këto “grupet e interesit”. Do të ruajë pronën, duke mos lejuar të tjera grupe interesi të bëjnë si të duan. Sot akuzohemi e sulmohemi për vonesa. Nëse ndokush ka kujtesë, vetëm pak muaj më parë ASHK akuzohej vetëm për mitmarrje dhe korrupsion. Ka vonesa. Nuk ka probleme. Ka ngërç. Nuk ka dështim. Vetëm pse duam t’i bëjmë gjërat shpejt dhe mirë, pavarësisht sabotimeve, dashakeqëve, atyre që duan të përfitojnë. Ne do t’i bëjmë për njerëzit. Për ata që në fakt nuk është i interesuar asnjë “grup interesi””.
