Nga Boldnews.al
Një histori e rëndomtë përfshiu javën e dytë të gushtit. Katër turistë italianë ikin pa paguar në një restorant në Berat. Episodi bëhet viral në rrjete sociale. E sheh kryeministri Edi Rama. Ia thotë homologes së tij italiane, Xhorxhia Meloni, e cila gjendej në vizitë private në Shqipëri.
Meloni ngarkon ambasadorin italian që të paguajë faturën 80 euro. “Nuk mund të lejojmë që ky të jetë imazhi i turistëve italianë”. Më pas, Meloni e kuptoi gafën dhe tha që faturën e pagoi nga rroga e saj.
Episodi pompohet në çdo intervistë që dha kryeministri Rama për mediat italiane gjatë kësaj jave.
Një histori populiste, në të cilën Rama dhe Meloni dhanë shembullin se si zgjidhen “incidentet” që cënojnë imazhin e pushuesve.
A do të veprojnë në çdo rast kështu? A do të vendosin dorën e tyre të ngrohtë të populizmit edhe për këtë rastin më poshtë, i cili ka ndodhur po në këtë gusht?
Italiani Xhuzepe Kapeçi vjen turist në zonën e Shkëmbit të Kavajës, në Durrës. Merr një apartament në katin e pestë të një ndërtese me 7-8 kate. Përballë ballkonit të tij është apartamenti, ku qëndron një zonjë nga Tirana, së bashku me dy vajzat e saj mbi 20-vjeçare.
Turisti italian, sa herë që sheh zonjën dhe vajzat e saj, kryen veprime perverse. Fërkon fund-barkun dhe organet gjenitale, fërkon barkun, bën shenja me gjuhë dhe buzë.
Zonja dhe dy vajzat e saj shqetësohen nga këto veprime të turistit italian, njoftojnë pronarin e apartamentit dhe administratorin e pallatit.
Turisti italian u thotë se nuk po ngacmon zonjën dhe vajzat e saj të reja, por ishte duke u krruar, një proces normal fizik.
Në vijim, turisti Xhuzepe vijon me shfaqjet e tij të shëmtuara. Zonja e filmon me celular dhe njofton policinë.
Autoritetet e arrestojnë dhe e dërgojnë në gjykatë. Togat e zeza, pasi panë provat dhe pamjet filmike, vendosin ta dërgojnë në qeli Xhuzepe Kapeçin për “ngacmim seksual”.
Ky personazhi, me veprimet që ka bërë, cënon më shumë imazhin e “turistëve italianë” se sa katër të rinjtë që ikën pa paguar faturën 80 euro të restorantit në Berat.
Çfarë do të bëjnë Rama e Meloni në këtë rast? A do t’i japin një dorë Xhuzepes, siç u dhanë 4 të rinjve të tjerë, në “emër të mbrojtjes së imazhit të turistëve italianë”?
Historitë me turistë që largohen pa paguar apo që kryejnë perversite nuk lidhen me shtetësinë apo kombësinë e autorëve të tyre. Ato janë përgjegjësi personale e kujtdo që i kryen, ndaj është tërësisht e pavend, madje të hapin barkun, këto historitë populiste të kryeministrave.
