Një ngjarje e rëndë është regjistruar në Itali, pasi një fëmijë 8-vjeçar ka humbur jetën për shkak se është thithur nga tubi kulluesi i pishinës.
Ngjarja e pazakontë ndodhi në qytetin Terme di Cretone, jo shumë larg Romës. Mediat italiane shkruajnë se i mituri ka rënë në pishinë në momentin kur është lajmëruar sinjali zanor për mbylljen e banjave termale. 8-vjeçari i quajtur Stefan përfundoi në fund të pishinës në vetëm pak çaste pasi kulluesi e thithi të gjithë ujin dhe më pas u zhduk në tub, raporton Corriere della Sera.
Vizitorët u përpoqën të shpëtonin djalin, por nuk ia dolën dot. Ekipet e shpëtimit dhe zjarrfikësit kanë nxjerrë trupin e djalit me ndihmën e litarëve dhe dorezave pas dy orësh.
Në bazë të hetimeve, hetuesit dolën në përfundimin se djali ka rënë në pishinë në momentin e zbrazjes dhe pastrimit, që është një praktikë e zakonshme në banjat termale, por është e paqartë pse sistemi i kullimit është ndezur ndërkohë që kishte ende vizitorë në pishinë.
Prokurori publik i Tivolit, i cili po heton rastin, urdhëroi hetimin dhe kontrollin e funksionimit të sistemit të kullimit në pishinë.
