Policia e Korçës ka arrestuar një 23-vjeçar, pasi akuzohet për vjedhje.
Në kuadër të operacionit të koduar “Precedenti” është vënë në pranga shtetasi Orgen Munushtiri, banues në Korçë. Ditën e djeshme, 23-vjeçari ka grabitur 430 mijë lekë të vjetra nën kërcënimin e thikës në tre biznese në qytetin juglindor. Ai është kapur nga uniformast blu tek terminali i autobusëve.
“Shërbimet e Policisë menjëherë pas marrjes së njoftimit, se në lagjen nr. 5, një shtetas kishte kanosur me mjet prerës (thikë), shitësen në një market, kishte marrë një shumë parash dhe ishte larguar, kanë organizuar punën për identifikimin, kapjen dhe arrestimin e autorit.
23-vjeçari, pasi kreu vjedhjen në market dhe u largua, kreu vjedhje dhe në 2 biznese të tjera, në lagjet nr. 7 dhe nr. 9, Korçë, duke marrë një sasi lekësh. (Gjithsej në të tria bizneset, 23-vjeçari mori 43000 lekë të rinj).” thuhet në njoftimin e bluve të Korçës.
Policia njofton se vijojnë hetimet për të zbardhur vjedhje të tjera që mund të ketë kryer nga Orgen Munushtiri. Materialet procedurale i kaluan Prokurorisë së Korçës për veprime të mëtejshme.
