Dega e Partisë Demokratike të Kukësit (grupim në mbështetje të Lulzim Bashës) ka bërë sërish thirrje që demokratët të dalin me një kandidaturë të vetme në zgjedhjet e reja që do të mbahen më 24 Shtator për zgjedhjen e kryebashkiakut të ri të qytetit verilindor.
Ky reagim vjen, pasi kreu i PD-së, Sali Berisha, gjatë konferencës me gazetarët e mohoi kategorikisht bashkëpunimin me grupimin e Lulzim Bashës për zgjedhjet e 24 shtatorit në Kukës.
Në reagimin e tyre, PD e Kukësit bën sërish apel “për gjetjen e një zgjidhjeje gjithëpërfshirëse për të gjithë demokratët, bashkimin e tyre në një përfaqësim dinjitoz, për të garuar me një kandidaturë të gjithëpranuar”.
Më tej thuhet se demokratët kanë humbur shumë prej frymës së konfliktit dhe gjuhës së përçarjes dhe sipas tyre, ka ardhur koha që të gjithë demokratët dhe opozitarët, të mos humbin më asnjë shans për shkak të vendosjes së interesit personal mbi atë të demokratëve.
Reagimi i degës së PD-së në Kukës:
“Partia Demokratike Dega Kukës rikonfirmon para të gjithë anëtarëve dhe simpatizantëve të saj apelin për gjetjen e një zgjidhjeje gjithëpërfshirëse për të gjithë demokratët, bashkimin e tyre në një përfaqësim dinjitoz, për të garuar me një kandidaturë të gjithëpranuar.
Demokratët kanë humbur shumë prej frymës së konfliktit dhe gjuhës së përçarjes. Interesi i demokratëve dhe i të gjithë qytetarëve të Kukësit që duan ndryshim është dalja me një kandidat të vetëm të të gjithë spektrit opozitar për bashkinë Kukës.
Ka ardhur koha që të gjithë demokratët dhe opozitarët, të mos humbin më asnjë shans për shkak të vendosjes së interesit personal mbi atë të demokratëve.
Partia Demokratike është e përkushtuar pa asnjë rezervë dhe paragjykim për të mundësuar përfaqësimin dinjitoz të së djathtës shqiptare në garën për Bashkinë e Kukësit me një kandidat fitues dhe e hapur për bashkëpunim me të gjithë ata që duan një kandidat të denjë për Kukësin dhe një Parti Demokratike fituese, si e vetmja shpresë për kthimin e pushtetit në duart e qytetarëve”, shkruan PD e Kukësit.
Zgjedhjet në Kukës/ Dega e PD së Bashës kërkon bashkimin e demokratëve në një kandidat
