Detaje të reja janë publikuar për ngjarjen e rëndë të ndodhur në plazhin e Llamanit, ku mbeti i plagosur rëndë një 16-vjeçar dhe një tjetër adoleshent mori plagë më të lehta.
Fillimisht ngjarja u raportua si aksidentale nga Policia e Shtetit, që në njoftimin paraprak bënte me dije se dy djemtë janë lënduar kur janë hedhur nga shkëmbi për të notuar.
Por në sajë të veprimeve të mëtejshme hetimore, ngjarja është zbardhur dhe dokumentuar plotësisht, me autoritetet që në një njoftim të dytë sqarojnë se shtetasi K. Xh. (16 vjeç) dhe shoku i tij, shtetasi D. K. (17 vjeç), janë plagosur pas përplasjes së dy mjeteve lundruese Jet Ski.
Dy adoleshentët nga Tirana ndodheshin në bregdetin e Jugut së bashku me dy bashkëmoshatarë të tjerë, njëri prej të cilëve, i identifikuar si shtetasi U. K. (17 vjeç) është proceduar penalisht për veprën penale “Plagosja e rëndë nga pakujdesia”.
Të katër shokët e mitur gjatë manovrave në det janë përplasur dhe për shkak të incidentit, 16-vjeçari ka marrë plagë të rënda. Për këtë arsye ai është transportuar me helicopter drejt spitalit të Traumës në Tiranë.
Sakaq, procedimi penal ka nisur edhe për 56-vjeçarin me iniciale R. P., i cili është pronari i mjeteve lundruese Jet Ski, pasi akuzohet për veprën penale “Shkelja e rregullave teknike në punë”.
Gjithashtu, operatorit turistik me administrator 56-vjeçarin, nga ana e Drejtorisë Vendore për Kufirin dhe Migracionin Vlorë i janë bllokuar menjëherë të gjitha mjetet lundruese Jet Ski dhe është bërë pezullimi i aktivitetit për arsye sigurie.
“Nga hetimet ka rezultuar se: Në Llaman, shtetasit K. Xh. dhe D. K., së bashku me shtetasit U. K. dhe R. P., 17 vjeç, nga Tirana (të katërt shokë me njëri-tjetrin) janë futur në det, me 2 mjete lundruese Jet Ski.
Gjatë manovrave në det, dyshohet se aksidentalisht dy mjetet lundruese janë përplasur me njëra – tjetrën dhe për pasojë janë dëmtuar drejtuesi i njërit mjet Jet Ski, shtetasi K. Xh. dhe pasagjeri, shtetasi D. K. Shtetasi K. Xh., u transportua në Tiranë për ndihmë mjekësore më të specializuar.
Fillimisht, shtetasit U. K. dhe R. P., si pasojë e tronditjes, kanë dhënë dëshmi të rreme duke thënë se dy shokët e tyre u dëmtuan pasi u hodhën nga shkëmbi në det, por më pas, gjatë hetimeve, kanë deklaruar të vërteten. Të gjitha veprimet hetimore në lidhje me këtë ngjarje janë drejtuar nga prokurori dhe po në drejtimin e tij vijon puna për dokumentimin e plotë të kësaj ngjarjeje”, njofton policia.
