Betejat ligjore me të cilat duhet të përballet Donald Trump vazhdojnë të shtohen në numër, por paradoksalisht me të njëjtin trend rriten edhe donacionet financiare që ai merr, së bashku me mbështetjen në sondazhet elektorale.
Ndjekjet penale dhe akatakuzat ndaj ish-Presidentit po rezultojnë se nuk e dëmtojnë manjatin, por po sjellin më shumë përfitime financiare në një vend ku fitoret elektorale arrihen me miliarda dollarë kosto të fushatës.
Të dielën, madje edhe para aktakuzës së tij të katërt penale në shtetin e Xhorxhias, kandidati republikan për president u ka dërguar një e-mail mbështetësve të tij, duke u bërë thirrje atyre të revoltohen përballë drejtësisë, duke futur në fakt dorën në portofolin e tyre për ta mbështetur financiarisht.
“Departamenti i Drejtësisë i Biden-it po përpiqet të më fusë në burg përjetë pa prova”, shkruante ai përpara se t’u kërkonte “patriotëve” të tij të dhuronin 24 deri në 1000 dollarë për fushatën.
“Mbijetesa e Republikës sonë varet nga një fije peri, Amerika ka nevojë për ju”, shprehej Trump.
Që nga aktakuza e tij e parë në pranverë në Nju Jork, Trump ka përmbytur mbështetësit e tij me mesazhe dhe e-maile të ngjashme me tekste që përmbajnë të njëjtën retorikë nxitëse.
Rezultati i kësaj retorike ka qenë bindër, pasi grupi i fushatës republikane njoftoi se ka mbledhur mbi 4 milionë dollarë në 24 orë pas ndjekjes së parë penale të konfirmuar për Trump, që përkon me pagesat e tij për të blerë heshtjen e ish-yllit të pornos Stormy Daniels.
Ai gjithashtu u mburr se mblodhi gati 7 milionë dollarë menjëherë pasi iu komunikua aktakuza e dytë federale për dokumentet e klasifikuara që mori me vete kur u largua nga Shtëpia e Bardhë.
Duke ilustruar ndikimin që ka Donald Trump në bazën e tij, mijëra amerikanë po i përgjigjen thirrjeve të tij për donacione.
