Federata Italiane e Futbollit njoftoi ditën e sotme se Roberto Mancini kishte dhënë dorëheqjen nga posti i trajnerit të kombëtares dhe se janë në kërkim të një trajneri të ri, në më pak se një vit para fillimit të kampionatit “Euro 2024”.
Në njoftim nuk jepeshin arsyet e dorëheqjes, teksa ky lajm befasoi jo pak tifozët, pasi Roberto Mancin qëndroi në detyrë në një moment kritik të historisë së futbollit italian, kur nuk arriti të kualifikohej në Kupën e Botës “Katar 2022” edhe pse ishte kampioni aktual i Evropës, në atë që ishte Botërori i dytë radhazi, pa praninë e ‘azzurrëve’.
Por, duket se ai është tunduar nga milionat e sheikëve. Ai ka arritur një marrëveshje përfundimtare me Federatën e Futbollit të Arabisë Saudite për të drejtuar skuadrën kombëtare arabe për tre vitet e ardhshme, sipas një media sportive saudite “Arriyadiyah”.
“Federata Saudite e Futbollit ka arritur një marrëveshje për të nënshkruar një kontratë trevjeçare me italianin Roberto Mancini, si trajner i kombëtares saudite”, njoftoi mediumi në platformën “X” (ish-Twitter).
Gazeta deklaroi se nënshkrimi është “zyrtar”, edhe pse deri më tani kanalet e federatës nuk kanë vendosur ende për ta publikuar këtë çështje.
Inkorporimi i italianit në krye të ekipit arab do të bëhet pesë muaj, pasi paraardhësi i tij, francezi Hervé Renard, ndërpreu kontratën e tij me federatën saudite për të marrë frenat e ekipit francez të futbollit të femrave, i cili u eliminua të shtunën nga Kupa e Botës në penallti kundër Australisë.
Roberto Mancini largohet nga pankina e Italisë pas 61 ndeshjesh, me një total prej 39 fitoresh, 13 barazime dhe 9 humbje.
