Ish-deputeti i PD-së dhe ish-kandidati për kreun e Bashkisë së Elbasanit, Luçiano Boçi ka bërë një denoncim ditën e sotme në lidhje me kompaninë “AlbTek Energy” të inceneratorit të Elbasanit.
Në një postim në rrjetet sociale, Boçi shkruan se kompania rezulton të ketë një fitim për vitin 2022 rreth 860 milion lekë, megjithëse pronarja është e dënuar për aferën e inceneratorëve dhe kompania është në sekuestro, ndërsa inceneratori i Elbasanit i ka kaluar në pronësi Bashkisë Elbasan.
Teksa shtron pyetjen se nga dolën këto fitime, Boçi shkruan se kompania “ALBTEK” zotëron për 25 vite impiantin e prodhimit të energjisë brenda inceneratorit të Elbasanit dhe fitimet që vijnë nga energjia i kalojnë “ALBTEK”, sipas kontratës korruptive të Ministrisë së Energjitikës të lidhur në mënyrë abuzive më 09.11.2016 mbi kontratën e parë të ndërtimit të inceneratorit të datës 16.12.2014.
Boçi i bën thirrje SPAK-u të hetojë me urgjencë këtë akt korruptiv.
Postimi i plotë:
GOZHDA E NASTRADINIT QË PJELL MILIONA NGA KORRUPSIONI
Lajmi për bilancin e kompanisë ALBTEK ENERGY, ka trazuar dhe njëherë debatin politik dhe çështjen penale për impiantin e prodhimit të energjisë në inceneratorin e Elbasanit.
ALBTEK rezulton të ketë një fitim për 2022 rreth 860 milion lekë, megjithëse pronarja është e dënuar për aferën e inceneratorëve dhe kompania është në sekuestro.
Ndërkohë Inceneratori i Elbasanit i ka kaluar në pronësi Bashkisë Elbasan.
Atëhere një pyetje e thjeshtë: nga dolën këto fitime për ALBTEK?
Dhe përgjigja është po kaq e thjeshtë.
ALBTEK zotëron për 25 vite impiantin e prodhimit të energjisë brenda Inceneratorit, mgjs të akuzuarit përfshi Ramën dhe sot e kësaj dite deklarojnë pa asnjë përgjegjshmëri që impiantin e prodhimit të energjisë e ka BASHKIA Elbasan.
Ndërkohë të gjitha dokumentet përfshi ekstraktin e kompanisë në Qendrën Kombëtare të biznesit, tregojnë të kundërtën.
Fitimet që vijnë nga energjia i kalojnë ALBTEK, sipas kontratës korruptive të Ministrisë së Energjitikës të lidhur në mënyrë abuzive më 09.11.2016 mbi kontratën e parë të ndërtimit të inceneratorit të datës 16.12.2014.
ALBTEK ka dorëzuar INCENERATORIN por ka lënë aty gozhdën e Nastradimit me ndihmën e Ramës e Gjiknurit. Gozhda quhet IMPIANTI I PRODHIMIT TË ENERGJISË.
Dhe jo një gozhdë dosido si ajo e Nastradinit për të varur xhaketën, por një gozhdë që pjell jo pak, por plot 860 milion lekë, të marra nga taksat e qytetarëve të bashkive të qarkut Elbasan.
Një akt korruptiv që kërkon të zbardhet me urgjencë për të ndalur grabitjen e qytetarëve.
SPAK të mos hezitojë të zbardhë përfshirjen në krim të Kryeministrit!
