Një tërmet me magnitudë 5.3 ballë të shkallës Rihter goditi mbrëmjen e djeshme Turqinë jugperëndimore, duke rikthyer gjendjen e panikut në Malatya dhe Gaziantep, rajonet që pësuan humbjet më të mëdha në njerëz nga lëkundjet shkatërrimtare të 6 shkurtit të këtij vit.
Lëkundje më të lehta janë regjistruar edhe në Dijarbakir, ku është raportuar një tërmet me magnitudë 4.2 ballë në thellësinë 16.81 kilometra. Pas saj, lëkundje janë regjistruar edhe në Antalia dhe Malatia.
Ministri turk i Shëndetësisë, Fahrettin Koca, njoftoi se tërmeti i mbrëmshëm la pas 23 qytetarë të plagosur dhe dhjëtra banesa të dëmtuara.
Pa u shuar ende gjendja e ankthit që la pas tërmeti, mediat turke kanë nxituar të marrin prononcimin e gjeologut, Prof. Dr. Naci Görür, i cili njihet si “parashikuesi” i këtyre fatkeqësive natyrore.
Görür paralajmëroi se lëkundje të tjera do të pasojnë në zonën e Gaziantep por edhe në Adana, Kayseri, Adıyaman dhe Hakkari. Më tej ai shpjegon se këto provinca janë afër rajonit ku shtrihet edhe Anadolli Lindor.
“E kam deklaruar edhe më parë se nuk do të ishte e habitshme nëse në këtë rajon do të ndodhin tërmete të kësaj natyre. Është shumë e natyrshme. Tani rajoni i Anadollit Lindor është i ndarë nga brezi malor Bitlis-Zagros në pllakën arabe e cila është vazhdimisht duke lëvizur drejt veriut, në drejtim të Euroazisë. Shumica e Anadollit po i afrohet Greqisë. Nëse periudha e përsëritjes është 500 vjet, atëherë fuqia do të grumbullohet dhe do të ketë një tjetër tërmet shkatërrimtar”, tha ai.
