Deputeti grek i partisë “Demokracia e Re” të kryeministrit Kyriakos Mitsotakis do të ndalet sot në Tiranë, ku do të zhvillojë një takim me në ambientet e paraburgimit te Qendra Spitalore e Burgjeve (Nënë Tereza), me kryebashkiakun e zgjedhur të Athinës.
Syrgios vjen në Tiranë si misionar i kryeministrit, i cili në daljet publike ka kërkuar gjykimin e drejtë të çështjes së Belerit, ndërsa Athina zyrtare ka kërkuar lirimin e tij duke kërcënuar Shqipërinë edhe me procesin e anëtarësimit në Bashkimin Europian.
Vizita e deputetit grek në Shqipëri vjen në një moment domethënës, pasi Beleri plotëson 3 muaj qëndrim në paraburgim. Beleri është arrestuar prej 12 Majit nën akuzën për shitblerje votash dhe për shkak të përballjes me drejtësinë ende nuk e ka ushtuar funksionin e tij, pavarësisht se doli fitues në zgjedhjet e dy ditëve më pas për Bashkinë e Himarës.
Fakt është se nëse Beleri vijon të qëndrojë pas hekurave, zgjedhjet në Himarë mund të përsëriten. Kjo pasi, Ligji Zgjedhor parashikon një afat tre mujor për betimin e kryetarit të zgjedhur, dhe për Belerin ky afat skadon ditën e hënë.
Për faktin se kalimi i afatit “legjitimon” Komisionin Qendror të Zgjedhjeve për të vazhduar përsëritjen e zgjedhjeve, pikërisht të hënën në orën 18:00, në pedonalen qendrore të Himarës do të zhvillohet një demonstratë për të kërkuar lirimin e tij.
Ky tubim është organizuar me iniciativën e organizatës “Omonoia”, ndërsa ka konfirmuar pjesëmarrjen edhe kryebashkiaku i Athinës Kostas Bakojanis. Ai pritet të jetë një ndër personat që do ti drejtohet protestuesve me një fjalim, duke kërkuar reflektim nga shtetit shqiptar mbi arsyet e vërteta të ndjekjes penale të Belerit.
Mbështetja e autoritetit bashkiak të Athinës për Belerin dhe familjen e tij nisi majin e kaluar menjëherë pas arrestimit të tij nga autoritetet shqiptare.
“Ne qëndrojmë pranë kandidatit për kryetar të Bashkisë së Himarës Fredi Beleri. Demokracia nuk burgoset“, ishte postimi i parë i Bakojanis.
Pak ditë më vonë, kryebashkiaku i propozoi këshillit të qytetit të Athinës një rezolutë mbështetëse, në të cilën theksohej nevoja e Shqipërisë për të respektuar standardet evropiane.
