Policia e Himarës ka zbuluar kanabis të mbjellë në zonat e dy lokaleve, në afërsi të njëri-tjetrit, në plazhin e Krorëzës, teksa ka arrestuar dy pronarë, ka shpallur në kërkim një pronar tjetër, si dhe ka proceduar penalisht kamarierin. Po ashtu, ata kishin zënë edhe hapësirë publike, për çadra dhe shezlongë.
Në kuadër të operacionit të koduar “All in” janë vënë në pranga shtetasit Argjend Nanaj, 28 vjeç dhe Ejkel Ismaili, 39 vjeç, të dy banues në Sarandë; u shpall në kërkim shtetasi Kostandin Vogli, 28 vjeç, banues në Himarë dhe u proceduan në gjendje të lirë shtetasit Th. M., 19 vjeç, banues në fshatin Piqeras dhe F. K., 25 vjeç, banues në Himarë.
“Nga veprimet hetimore rezultoi se Argjend Nanaj dhe Kostandin Vogli, si dhe shtetasi Ejkel Ismaili, kishin përshtatur 2 lokalet në pronësi të tyre, në plazhin e Krorëzës, për veprimtaritë kriminale të kultivimit dhe shitjes së cannabis sativës dhe se kishin pushtuar hapësirë publike, për të vënë çadra dhe shezlongë, pa autorizim. Gjatë kontrollit të ambienteve të këtyre lokaleve dhe të territoreve përreth, u gjetën një sasi lënde narkotike cannabis sativa e ndarë në vazo dhe në qese, një sasi municioni luftarak dhe 89 bimë narkotike cannabis sativa. Gjithashtu, për këtë rast u procedua në gjendje të lirë, për moskallëzim të krimit, shtetasi Th. M., kamerier. Më tej, lënda narkotike, municioni luftarak, çadrat dhe shezlongët u sekuestruan në cilësinë e provës materialet, ndërsa bimët narkotike u asgjësuan nëpërmjet djegies.
Në vijim të këtij operacioni, u konstatua se për llogari të një lokali tjetër, gjithashtu në plazhin e Krorëzës, ishte pushtuar hapësirë publike, me qëllim vënien e çadrave dhe shezlongëve, pa autorizim. Për këtë rast, u procedua penalisht administratori i këtij lokali, shtetasi F. K., si dhe u sekuestruan çadrat dhe shezlongët.” thuhet në njoftimin e Policisë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.
