Banorët e Fierzës në Tropojë janë ngritur në protestë këtë të mërkurë kundër shfrytëzimit pa kriter të materialeve inerte anës rrugës dhe ndërtimit të fabrikës së bitumit, pranë ujësjellësit të kësaj njesie, vetëm 50 metra larg rrugës nacionale Fierzë-sheshi i trageteve – Bajram Curri.
Sipas banorëve, këto gurore po dëmtojnë turizmin duke shkaktuar ndotje të ambientit e shkatërrim të habitatit natyror të maleve. Po ashtu, ata shprehen se ndihen të rrezikuar edhe fëmijët e tyre nga makineritë e rënda që transportojnë materialet inerte që shkojnë në shkollë në të njëjtën rrugë.
Ata shprehen se turizmi malor është i kërcënuar, siç është rasti i bujtinës Adora, e cila prej vitesh ushtron aktivitetin e saj turistik, por në hyrje të këtij resorti guroret bëjnë gërmimin e faqes së malit, duke shkaktuar zhurma, pluhur e shqetësime për turistët.
Banorët janë ngritur disa herë në protestë, por puna në njërën nga guroret nuk është ndërprerë, ndonëse banorët pretendojnë se ata nuk kanë asnjë dokumentacion ligjor për ta ushtruar këtë aktivitet.
Protestuesit kërkojnë nga organet ligjzbatuese të ndërpresin menjëherë këtë aktivitet të paligjshëm e situata të kalojë në normalitet. Siç shihet dhe në foton e mëposhtme, ata kanë bllokuar edhe rrugën me automjete.
