Një tjetër gradaçelë pritet t’i shtohet Tiranës mes pallateve 9-Katëshe dhe Teatrit të Operës dhe Baletit, duke asgjësuar të vetmen hapsirë të gjelbër të mbetur për qytetarët.
Ky projekt i parashikuar të përfundojë pas 7 viteve punë, është kundërshtuar nga lëvizja Bashkë me në krye Arlind Qorin.
Pasditen e kësaj të diele, aktivistët e lëvizjes së bashku me qytetarët e Tiranës, u mblodhën në kantierin e ndërtimit duke kërkuar ndalimin e betonizimit të kryeqytetit dhe shkatërrimit të parqeve.
Vendi i ndërtimit, u quajt një skenë krimi nga protestuesit, të cilët me pankarta në duar hoqën murin rrethues të lulishtes dhe përsërisnin thirrjen “Larg duart nga parku’.
Kryetari i Lëvizjes Bashkë, Arlind Qori, tha mes të pranishmëve se kullat janë për të pastruar paratë e drogës e korrupsionit.
“Tirana është një nga më të varfërat në Ballkan. Këto hotele të pafundme nuk do ti shërbejnë konsumatorëve, se Tirana është një qytet i varfër. Këto kulla kanë një funksion; të pastrojnë paratë e drogës, paratë e korrupsionit, këto kulla jo vetëm po shkatërrojnë qytetarin, por nuk do të kenë asnjë minimum funksionaliteti. Kush blen zyra, apartamente në këtë qytet që po zbrazet? Fatkeqësia e Tiranës ka një qeveri nga hajduta e përbindësha. Ka një sistem të përbërë nga parti të vjetra që përbëjnë nga të njëjtët oligarkë”, u shpreh Qori.
Veç aktivistëve, të pranishëm ishin edhe banorë të lagjes së rrugës së barrikadave, që shprehën revoltën për shtimin e kullave duke e kthyer zonën përreth në errësirë të përhershme. Teksa të indinjuar ishin edhe me mosreagimin e opozitës.
“Unë vija prej 40 vitesh këtu me bashkëshortin, nipa, mbesa. Ku të kyçemi? Ç’po bëhet kështu ? S’na dëgjojnë”, tha një zonjë.
“Po na zhdukin parqet. Duhet ta ndalojmë. Po opozita po bashkëpunon? Pse nuk flet? Turp, turp”, u shpreh një banor.
Gjithashtu mes protestuese ishte edhe aktivisti dhe pedagogu Ervin Goci, i cili u shpreh se ky sistem nuk do të ndalojë deri sa të ndëtojë në çdo cep të vendit.
“Kjo kauzë dhe shumë kauza të tjera, ndërtimi në Tiranë nuk ka asnjë dallim nga inceneratori. Skema e inceneratorëve ndoshta është më e shpejtë, por skema të tilla janë grabitje. Toka këtu është pasuri publike, siç mbrohen taksat duhet mbrojtur edhe prona.”, tha ai.
