Një tjetër ngjarje e rëndë ka ndodhur këtë të shtunë në lagjen “Sheq i Madh” në Fier, ku një 28 vjeçare është plagosur me armë zjarri nga bashkëshorti i saj, 49 vjeç.
Blutë bëjnë me dije se ngjarja ka ndodhur, pas një konflikti për motive të dobëta, dhe pasi ka qëlluar drejt gruas autori është larguar.
Por arratia e tij ka zgjatur shumë pak pasi është lokalizuar dhe kapur nga Policia. Ndërkohë është sekuestruar në cilësinë e provës materiale arma me të cilën autori plagosi bashkëshorten e tij.
Mësohet se 28 vjeçarja ndodhet në spital, në kujdesin e mjekëve. Ndërkohë grupi hetimor ndodhet në vendngjarje dhe në bashkëpunim me Prokurorinë vijon punën për sqarimin e plotë të rrethanave të ngjarjes.
