Rreth 50 minuta ka zgjatur mbledhja e Asamblesë Kombëtare të Partisë Socialiste, duke zgjatur më pak sesa pritej.
Ajo u mbajt me dyer të mbyllura, teksa ka patur vetëm një fjalim të kryeministrit Edi Rama, ku siç duket ka “shkundur” të tijët, duke marrë shkas dhe nga skandalet e njëpasnjëshme që kanë përfshirë mazhorancën kohët e fundit.
Gjatë mbledhjes ka patur vetëm dy emërime të reja në kupolën e Partisë Socialiste. Bledi Çuçi është emëruar kryetar i Grupit Parlamentar të Partisë Socialiste në vend të Taulant Ballës, ku ka patur një “rrokadë” mes tyre. Ky emërim vjen dy javë pas shkarkimit të Çuçit nga posti i Ministrit të Brendshëm, të cilin ia zuri Taulant Balla.
Ndërkohë, ndryshime ka patur dhe sa i përket postit të Sekretarit të Përgjithshëm të PS-së. Nga kjo detyrë është larguar Damian Gjiknuri dhe në vend të tij është emëruar Blendi Klosi. Kështu, Gjiknuri “zhvishet” nga një post i rëndësishëm në PS dhe pritet të shihet nëse dhe me të do të ndodhë njësoj si me rastin Ahmetajn, ku pasi u largua nga çdo post në qeveri dhe në PS-së, Rama ialëshoi drejtësisë për çështjen e inceneratorëve.
Ndërkohë, pavarësisht nga çfarë ishte raportuar në media, nuk ka patur ndryshime sa i përket në lidhje me 12 drejtuesit e PS-së në Qarqe.
Po ashtu, nuk ka patur as ndryshime në Qeveri, teksa burime bëjnë me dije se kryeministri Edi Rama ka deklaruar në fund të mbledhjes se me qeverinë do të merret nesër ose pasnesër. Nuk dihet nëse Rama e ka patur fjalën për ndryshime në kabinetin qeveritar apo jo.
Më herët, në media u raportua se kryeministri Edi Rama kishte shkarkuar ministren e Ekonomisë dhe Financave, Delina Ibrahimaj dhe në vend të saj do të emërohej zv.ministrja e Financave, Olta Manjani, por kjo gjë nuk ndodhi. Si Rama, po ashtu dhe Ibrahimaj e mohuan shkarkimin po ashtu dhe dorëheqjen, teksa ministrja i konsideroi lajmin si “thashethem vere”.
Pas Asamblesë, kryeministri Edi Rama ka planifikuar të mbajë një takim informal dy ditor, në datat 28-29 Korrik, me kabinetin qeveritar në Tepelenë. Aty pritet të shihet dhe nëse do ketë apo jo ndryshime në rang ministrash.
Ndërkohë, burime bëjnë me dije se në vjeshtë do të mblidhet dhe Kongresi i Partisë Socialiste.
