Procesi i votimit në Bashkinë e Rrogozhinës ka nisur në orën 07:00, ku rreth 33 mijë qytetarë pritet t’i drejtohen sot qendrës së votimit, pas shpalljes së pavlefshme të zgjedhjeve të 14 majit, ku 2 kandidatët Edison Memolla i PS-së dhe Shkëlqim Hoxha i koalicionit “Bashkë Fitojmë” kanë një shans të dytë për t’u besuar nga qytetarët.
- Parregullsitë
Procesi i votimit nisi me probleme pasi në dy qendra komisioneret kanë shkuar me vonesë. Por jo vetëm kaq!
Në qendrën e votimit 2225/0 në Rrogozhinë u tentua për të votuar familjarisht. Menjëherë pas këtij rasti pati ndërhyrje nga KQZ. Për pak minuta votimi u ndërpre dhe rinisi sërish.
Në qendrën e votimit nr.22-23 në Rrogozhinë, është ndërprerë procesi i votimit pasi janë identifikuar dy raste të fotografimit të votës.
Kjo gjë ka sjellë debate mes komisionerëve, teksa është ndaluar procesi i votimit. Por ndërkohë një prej vëzhguesve ka penguar mediat të kryejnë detyrën e tyre.
Në këtë qendër votimi pritet që të votojë edhe kandidati i Bashkë Fitojmë Shkëlqim Hoxha.
‘I është bërë foto fletës së votimit. Do të mbyllet votimi deri sa të vijë kryetari i KZAZ.’– u shpreh një vëzhgues.
Pas ndërhyrjes së kreut të KZAZ, i cili ka deklaruar se mediat janë në misionin e tyre, gazetarët dhe operatorët janë lejuar të vijojnë me punën e tyre.
Për këtë rast ka reaguar edhe deputeti demokrat Oerd Bylykbashi. Bylykbashi tha se ky rast nuk është problematik por vepër penale, dhe se opozita ka denoncuar vazhdimisht dhe më 14 maj këto çështje.
“Ne e kemi denoncuar vazhdimisht, sigurisht komisioni e ka kapur. Ky është vepër penale jo problematikë”, tha Bylykbashi.
Gjithashtu, në dy qendra votimi ka një prani të madhe personash që nuk kanë lidhje me procesin zgjedhor dhe nuk janë votues.
Sipas urdhrit të KQZ-së, nuk duhet të ketë grumbullime jashtë ambienteve të QV-ve dhe persona që nuk kanë lidhje me procesin zgjedhor duhet të qëndrojnë 150 metër larg QV-në.
Në këto raste anëtarët e komisionit të QV-së duhet të mbajnë procesverbal dhe duhet të lajmërojnë policinë e shtetit.
- Pjesëmarrja në votime
Krahasuar me 14 majin, votimet në Rrogozhinë këtë herë po ecin me ritme më të shpejta. Pjesëmarrja deri në orën 10:00, sot më 23 korrik është 17.86% në krahasim me 11.5% që ka qenë në po të njëjtën orë më 14 maj.
Ndryshe nga 14 maji, do të kenë vetëm një fletë votimi, atë për kryebashkiakun, ku po njëjtë si në zgjedhjet vendore, i pari në fletën e votimit do të jetë i renditur kandidati socialist Edison Memolla dhe numrin 2 do ta mbajë Shkëlqim Hoxha.
Në këto zgjedhje nuk do të votojnë të burgosurit, që në zgjedhjet e fundit vulosën fitoren e Edison Memollës.
