Ka nisur numërimi i votave në KZAZ 43 për kreun e ri të Bashkisë së Rrogozhinës, pas më shumë se 4 orësh nga mbyllja e procesit të votimit. Shkak për vonesën e nisjes së procesit të numërimit të votave ka qenë mbërritja e numëruesve.
Mësohet se të 54 kutitë e qendrave të votimit kanë mbërritur në KZAZ 43, teksa janë 5 grupe pune të cilët kanë nisur numërimin e votave. Po ashtu bëhet me dije se jashtë ambientit rrethues të shkollës ku numërohen votat ka dhe eksponentë të Partisë Demokratike si Flamur Noka, Genc Strazimiri e vetë kandidati Shkëlqim Hoxha
Qytetarët e Rrogozhinës iu drejtuan sot sërish qendrave të votimit për të zgjedhur kreun e bashkisë së tyre, pasi zgjedhjet e 14 majit u shpallën të pavlefshme në këtë bashki. Dy kandidatët, Edison Memolla i Partisë Socialiste dhe Shkëlqim Hoxha i koalicionit opozitar “Bashkë Fitojmë”, u gjenden edhe një herë përballë vullnetit të qytetarëve.
Surpriza e këtyre zgjedhjeve ishte numri i lartë i votuesve, në krahasim me 14 majin. Pjesëmarrja në zgjedhjet e sotme në Rrogozhinë ishte rreth 36%, 4% më shumë se në zgjedhjet e 14 majit.
Në zgjedhjet e kaluara, fitoi kandidati i PS-së me vetëm 21 vota diferencë, me kutinë e burgut, shumë të kontestuar, që i dha fitoren. Ditën e sotme të burgosurit nuk kanë patur të drejtë votimi.
Ditën e sotme janë hasur deri në 4 – 5 raste të tentativës së fotografimit të votës. Për shkak të kësaj problematike në qendrën e votimit 22-23, çoi edhe në ndërprerjen e procesit për disa minuta. Për këtë incident reagoi menjëherë edhe Kryekomisioneri Ilirjan Celibashi, i cili tha se shqetësim mbetet edhe votimi familjar.
“Fotografimi i votës përbën një shkelje të rëndë të ligjit penal, ka sanksione dënimi që shkojnë deri në 3 vjet. U bëj thirrje të gjithë votuesve që t’i shmangen çdo lloj joshje nga subjektet për t’u treguar atyre se për kë kanë votuar. Ata rrezikojnë shumë në këtë rast. Votimi familjar gjithashtu përbën shkelje. Ky është një problem, sa të kemi mundësi do ta adresojmë.”
Ndërsa nënkryetarja e KQZ, Lealba Pelinku, pas vëzhgimit në terren konstatoi një pjesëmarrje të lartë të personave të paautorizuar në qendrat e votimit.
“Jam drejtuar drejt kësaj qendre për të parë se çfarë ka ndodhur. Komisioni duhej të mbante procesverbal. Unë e hasa personalisht në 4 qendra votimi në shkollën Lekaj, ku vihej re një prani personash të pautorizuar pa bexh që nuk duhet të rrijnë në qendrat e votimit.”
Gjatë gjithë ditës ka patur denoncime të shumta nga ana e opozitës për presion ndaj votuesve, manipulime të procesit zgjedhor, si dhe vënien e administratës në shërbim të Partisë Socialiste.
Gjatë pasdites, kreu i PD-së, Sali Berisha, publikoi në rrjetet sociale dhe një video ku një çift denonconin se si njerëz të kandidatit të PS-së, Edison Memolla i kishin kërcënuar se nëse nuk votonin në favor të kandidatit socialist, ata nuk do i linin me kaq.
