Dita e djeshme, e premtja e 21 Korrikut, mund të konsiderohet ndryshe si e “premtja e zezë” në Shqipëri, për shkak se u regjistruan 11 jetë të humbura tragjikisht brenda pak orësh në vendin tonë.
Ngjarja më e rëndë mbetet ajo në liqenin e Banjës në Gramsh, ku u mbytën 4 anëtarë të një familjeje: Arben Zogu, 46 vjeç dhe dy djemtë e tij, Ruben dhe Esti Zogu (19 dhe 14 vjeç) dhe nipi i 46-vjeçarit, Melsi Zogu 20-vjeç. Dyshohet se ata janë futur për t’u larë dhe pasi është mbyturi pari, në përpjekje për të shpëtuar njëri-tjetrin janë mbytur të katërt.
Po ashtu, gjatë pasdites, një 40-vjeçar humbi jetën në aksident në fshatin në fshatin “Shën Vasil” të Himarës. Viktima është Renato Bushi, i cili humbi kontrollin e mjetit të tij dhe doli nga rruga dhe përt pasojë mjeti u përmbys. Ai humbi jetën në vend, ndërsa mbetën të plagosur tre pasagjerët: shtetas anglez Aduart Holand, 31-vjeç dhe një çift shqiptarësh, Kevin Rama 26-vjeç nga Gramshi dhe bashkëshortja e tij Marika Zogari.
Gjatë orëve të mbrëmjes në fshatin Fortuzaj të Tiranës, një mjet tip “Range Rover” ka rënë në humnerë. Si pasojb e aksidentit, mbeti i plagosur drejtuesi i mjetit shtetasi D. Ç., 33 vjeç, si dhe humbi jetën pasagjeri, ende i paidentifikuar.
Ndërsa, rreth orës 21:30, në aksin rrugor Elbasan-Peqin, në fshatin Përparim, automjeti me drejtues shtetasin N. Xh., 20 vjeç, është përplasur me karrocën e tërhequr nga një kalë. Si pasojë e përplasjes ka humbur jetën shtetasi F. Z., 58 vjeç, banues në Peqin që drejtonte karrocën.
Po ashtu, u regjistruan dhe dy viktima në bregdet. Në plazhin e Tales humbi jetën shtetasi B.Xh, rreth 52 vjeç, banues në Kamzë, ndërsa në plazhin e Porto Romanos në Durrës humbi jetën shtetasi H. D., 68 vjeç, nga Durrësi. Për të dy, shkaku i vdekjes dyshohet arresti kardiak sapo kanë rënë në kontakt me ujin.
Gjatë paradites, një bojaxhi nga Durrësi humbi jetën në lagjen “Luigj Gurakuqi” të Elbasanit. Viktima është shtetasi M. Z., rreth 45 vjeç, i cili ishte duke lyer muret e një ndërtese në momentin kur ra nga skela dhe gjeti vdekjen në spital, duke mos u mbijetur dot plagëve të marra.
Ndërsa, në mëngjes, rreth orës 09:40, në Shkallnur të Durrësit, shtetasja D. G., 70 vjeçe, dyshohet se ka rënë në kontakt me rrymën elektrike, në banesë, dhe për pasojë humbi jetën.
