Të enjten, ish-zv/kryeministri Arben Ahmetaj u shpall zyrtarisht në kërkim nga drejtësia shqiptare, pasi Gjykata e Posaçme firmosi urdhër-arrestin e SPAK.
Mbi Ahmetajn rëndon masa e sigurisë “arrest me burg në mungesë”, ndërsa mbetet ende e paqartë në këtë fazë nëse ish-numri dy i qeverisë do të rikthehet në Shqipëri për t’u përballur me drejtësinë.
Duke qenë se vendndodhja e tij e fundit e njohur është Britania e Madhe, sipas deklarimeve të përfaqësuesit ligjor Henrik Ligori, një avokat shqiptar me bazë në Londër ka treguar në A2 procedurat ligjore që e presin Ahmetajn në rast arrestimi në ishull.
Avokati Agron Bicaku shpjegoi se vendi ynë me Britaninë kanë disa marrëveshje ekstradimi, dhe Shqipëria kategorizohet te lista e shteteve nga të cilat nuk kërkohen prova të mëdha në mënyrë që t’i hapet rrugë ekstradimit.
“Në momentin që zoti Ahmetaj shpallet në kërkim ndërkombëtar dhe marrim të mirëqenë faktin se ndodhet në Britaninë e Madhe. Atëherë Shqipëria ,me Britaninë kanë disa marrëveshje ekstradimi, me të fundit që është bërë në vitin 2018. Britania e Madhe i ka me dy kategori shtete nga të cilat kërkohet ekstradimi. Kategoria e parë hyjnë kërkesat që vijnë nga Bashkimi Europian. Kategoria e dytë në të cilën ndodhet dhe Shqipëria janë kërkesat nga pjesa tjetër e botës që ka minikategorinë A dhe Be. Në kategorinë A ku bëjnë pjesë Shqipëria hyjnë shtete nga të cilat Britania e Madhe nuk kërkon prova shumë të mëdha për një kërkesë ekstradimi, për të marrë të mirëqenë”, shpjegoi ai.
Më tej Biçaku sqaroi të gjitha hapat që ndiqen nga autoritetet britanike deri te marrja e kërkesës për ekstradim, arrestimi i personit në kërkim e deri te apelimi në shkallët e ndryshme të gjyqësorit.
“Kërkesa merret nga Home Office dhe plotësohet një formular ekstradimi, që i kalohet gjykatës, zakonisht gjykatave të rretheve. Gjykatësi sheh nëse janë ndjekur të gjitha procedurat ligjore. Nëqoftëse janë plotësuar kërkesat bazë për ekstradimin, gjykatësi lëshon një urdhër arresti. Në këtë rast personi në kërkim kërkohet nga të gjitha organet ligjzbatuese. Nëse Zoti Ahmetaj ndodhet në Britaninë e Madhe dhe autoritetet arrijnë ta lokalizojnë do t’i shërbejnë urdhrin e arrestit dhe më pas do ta paraqesin para gjykatës.
Nuk është se ka afat kohor. Nëse personi i arrestuar paraqitet para gjykatës, gjykata merr një vendim. Nëse ka vendosur që personi të ekstradohet atëherë personit i lind e drejta e apelimit. Brenda 14 ditëve që të merret vendimi për ekstradimin nga gjykata e rrethit. Apelimi bëhet në Gjykatën e Lartë dhe në rast se ekstradimi miratohet edhe nga Gjykata e lartë, personi ka të drejtë të apelojë në Gjykatën Supreme që jep vendimin përfundimtar.
Zoti Ahmetaj është person publik që ka pasur rëndësi të veçantë në Shqipëri, ndaj kërkesat e tij nëse do ta kundërshtojë ekstradimin në Britaninë e Madhe, mund të ndodhë për arsye nga më të ndryshmet. Një ndër to mund të jetë se nëse ekstradohet në Shqipëri nuk do të ketë një gjyq të pastër, të pandikuar politikisht dhe kjo besoj është një nga bazat që mund të marrë gjykata nëse do të arrijë në arrestimin e tij dhe të dalë para gjykatës.” – sqaroi ai
