Është zbardhur dinamika e vrasjes së biznesmenit Besmir Hida, ngjarje e ndodhur në tetor të vitit 2019 në Lushnje.
Blutë bëjnë me dije se janë identifikuar 3 autorët e vrasjes së 40 vjeçarit, të tre emra të njohur për policinë. Bëhet fjalë për Laert Haxhiu, Orgest Bilbili dhe Ardian Ahmetaj, persona të cilësuar me rrezikshmëri të lartë kriminale.
Për tre autorët Gjykata e Fierit ka caktuar masën ‘Arrest me burg’.
“U arrit që të sigurohen prova ligjore dhe të dokumentohet autorësia e një ngjarjeje të rëndë të ndodhur në Lushnjë, në vitin 2019.
Si rezultat i provave të siguruara nga hetimi intensiv, Gjykata e Shkallës së Parë e Juridiksionit të Përgjithshëm Fier, me vendimin e datës 16.07.2023, ka caktuar masat e sigurisë “Arrest në burg”, për autorët e kësaj ngjarjeje, shtetasit:
Laert Haxhiu, 31 vjeç, lindur dhe banues në Lushnjë, aktualisht i arrestuar në Greqi. Ky shtetas u arrestua në Janinë, në maj të këtij viti, gjatë një operacioni të përbashkët mes Policisë së Shtetit dhe Policisë greke. Pritet ekstradimi i tij drejt Shqipërisë;
Orgest Bilbili, 33 vjeç, lindur dhe banues në Lushnjë, aktualisht ndodhet në IEVP Drenovë, Korçë. Ky shtetas është dënuar me burgim të përjetshëm, në lidhje me një ngjarje të gjykuar më parë nga Gjykata e Shkallës së Parë për Korrupsionin dhe Krimin e Organizuar. Ditën e djeshme, atij i është kominikuar masa e sigurisë, për vrasjen e ndodhur në vitin 2019.
Ardian Ahmetaj, 49 vjeç, aktualisht ndodhet në burg, në Greqi, pasi është arrestuar në vitin 2020, gjatë një operacioni të përbashkët mes Policisë së Shtetit dhe Policisë greke. Ky shtetas është dënuar në vitin 2021, me 11 vjet burgim, nga Gjykata e Athinës, për armëmbajtje pa leje në rrethana rënduese, sipas Kodit Penal të shtetit grek”,- njofton Policia.
Biznesmeni, Besmir Hida, u vra në vitin 2019 qytetin e Lushnjës, në lagjen “Skënder Libohova”. Ai ndodhej brenda një lokali, ku 3 autorët e armatosur dhe të maskuar kanë zbrazur kallashnikovin drejt tij duke e lënë të vdekur në vend.
