Ministria e Bujqësisë ka reaguar pas raportimeve se fondet për programin e ndihmës për bujqësinë, IPARD II janë pezulluar si masë paraprake, pas një hetimi mbi dyshimet për korrupsion gjatë zbatimit nga Ministria e Bujqësisë.
Ministria e Bujqësisë thotë se “programi i mbështetjes nuk është ndërprerë, puna vazhdon, programi vazhdon”.
Më tej në reagim, pranon se është pezulluar një fond i parashikuar më herët për tu rimbursuar: “Autoritetet shqiptare janë vënë në dijeni të një pezullimi të faturës aktuale të rimbursimit nga DG AGRI për një pjesë të shpenzimeve te radhës”.
Sipas ministrisë, ky është një proces krejtësisht administrativ që lejon riverifikimin e sistemeve të kontrollit nga strukturat e akredituara të cilat do të marrin masat e nevojshme me qëllim vijimin normal të rimbursimit nga BE.
“Këto janë procedura normale të Bashkimit Europian në kushtet kur ka nevojë të verifikohen shpenzime të dyshuara për aktivitet jo konform rregullave të përcaktuara”, njofton ministria.
“Të gjithë strukturat shqiptare janë në bashkëpunim dhe në koordinim të vazhdueshëm me zyrën e OLAF dhe DG AGRI duke ofruar transparencë të plotë, sikurse kanë vepruar nga dita e parë e akreditimit, të të gjithë proceseve kontrolluese, hetuese dhe administrative të ndjekura deri më sot apo që mund të aktivizohen në të ardhmen”, thuhet më tej në reagim.
