Dy shtetas janë arrestuar nga Policia e Sarandës, pasi akuzohen për armëmbajtje pa leje dhe transportim emigrantësh kundrejt fitimit.
Në pranga kanë rënë, Kanixho Kalemi, 30-vjeç dhe Sefedin Beqiri, 19-vjeç.
“Në kuadër të operacionit policor të koduar “Fishnet” është bërë i mundur ndalimi i 30 vjeçarit, K.K i dyshuar për dhënie ndihmë për kalim të paligjshëm të kufirit, kundrejt pagesës, emigrantëve nga vendet e treta, ku në momentin e kapjes, iu gjetën 41 doza kokaine.
Në pranga është vënë gjithashtu edhe ish-kunati i tij, S.B, 19-vjeç, pasi u kap në banesën e 30-vjeçarit, me një armë zjarri pistoletë dhe municion luftarak
Arrestimi i tyre është bërë gjatë një aksioni në lagjen nr.2, Sarandë.
Në cilësinë e provës materiale u sekuestruan 41 dozat e kokainës, arma e zjarrit, municioni luftarak dhe 5 aparate celulare”,- njofton Policia.
Ndërkohë në drejtimin e Prokurorisë vijojnë veprimet hetimore për dokumentimin e plotë të veprimtarisë kriminale të këtyre shtetasve, identifikimin dhe kapjen e shtetasve të tjerë të përfshirë.
