Teksa opozita kërkonte në parlament përshpejtimin e procedurave për votimin e kërkesës së SPAK për arrestimin e Arben Ahmetajt, socialistët miratuan në komisionin e ligjeve të vetëm, projektligjin për legalizimin e kultivimit të kanabisit mjekësor.
Mësohet se mbledhja ishte e shkurtër dhe me votat e deputetëve socialistë u miratua projektligji për kanabisin, që kaloi për votim në seancën parlamentare të ditës së Enjte.
Deputetë të opozitës, nga seanca e Kuvendit thanë se mbledhja ishte e jashtëligjshme pasi ishte zhvilluar pa kuorumin e nevojshëm, ndërsa ata nuk ishin njoftuar për zhvillimin e saj.
“Ju merrni për 5 minuta vendimin për drogën. Po si keni arritur në këtë pikë?! E tha mirë Shalsi: ne vjedhim me lezet. Juve ju ka kap arroganca, nuk na llogarisni më”, tha deputeti demokrat Dashnor Sula në Parlament, i cili është dhe pjesë e komisionit të ligjeve.
Në një prononcim për mediat, deputeti tjetër demokrat te ligjet Saimir Korreshi, tha se nuk kishte një urdhër të kryetares së Kuvendit për zhvillimin e mbledhjes së komisionit në të njëjtën kohe me zhvillimin e seancës parlamentare. Kjo paligjshmëri sipas tij, bashkë me mungesën e kuorumit, e bën mbledhjen e ligjeve nul.
“U futën deputetët në një WC të Parlamentit, pa kamera, pa procesverbal dhe bënë mbledhjen e Komisionit. Për këto paska shpejtësi, për këtë tjetrën të Ahmetajt, duhet të presim 4-5 ditë. Rama duhet të kishte ardhur dhe të kërkonte falje para shqiptarëve se e kishte nxjerrë Ahmetajn si trurin e qeverisë së tij”, shtoi Korreshi.
Akuzën se mbledhja u zhvillua pa kuorum e përsëriti gjatë fjalës nga foltorja e Kuvendit dhe deputetja tjetër demokrate Ina Zhupa.
“Si kanabisit kaluat në 15 minuta ligjin e kanabisit fshehurazi, pa kuorum dhe vetëm për ti plotësuar dëshirën grupeve kriminale për të vazhduar të qetë të prodhojnë dhe transportojnë drogë në Shqipëri”, deklaroi Zhupa.
Mbledhja e komisionit të ligjeve në mesditë ishte e njoftuar më herët në faqen online të parlamentit, megjithatë, ndryshe nga praktika e zakonshme, zhvillimi i saj nuk u pasqyrua me lidhje video nga ky institucion.
Deri në momentin e publikimit të artikullit, nuk ka një njoftim zyrtar nga zyra e shtypit pranë Kuvendit lidhur me mbledhjen e zhvilluar dhe numrin e deputetëve të pranishëm.
Opozita ka kundërshtuar nismën që prej hedhjes së idesë së saj nga kryeministri Edi Rama, duke paralajmëruar për efektet negative të mundshme. Me skepticizëm nisma është parë dhe nga ekspertë të sigurisë si edhe Bashkimi Europian.
