Kreu i Grupit Parlamentar të Partisë Demokratike, Gazment Bardhi, ka reaguar pas deklaratave të kryeministrit Edi Rama lidhur me çështjen e njohur si “Aruba”, duke i cilësuar ato si një përpjekje për të shmangur vëmendjen nga faktet e përfshira në dosjet hetimore.
Në një reagim publik, Bardhi kundërshton pretendimin e Ramës se “Aruba” është një produkt i “algoritmit”, duke theksuar se informacionet e përmendura në këtë çështje burojnë nga materiale hetimore të administruara nga SPAK dhe nga përgjime zyrtare të autoriteteve ligjzbatuese belge.
Sipas tij, dokumentet hetimore përmbajnë të dhëna mbi takime dhe kontakte mes personave nën hetim dhe funksionarëve të lartë shtetërorë shqiptarë, të zhvilluara në vende të ndryshme, përfshirë Arubën.
Bardhi pretendon se këto materiale flasin për projekte të pasurive të paluajtshme në Shqipëri, të cilat dyshohet se mund të jenë financuar me fonde të paligjshme dhe të kenë pasur mbështetje politike.
“Faktet e dosjes së SPAK nuk janë marrë nga fusha e algoritmit, por nga përgjimet zyrtare të autoriteteve belge”, shprehet Bardhi, duke shtuar se provat e administruara nga organet ligjzbatuese nuk mund të zhbëhen përmes deklaratave politike apo ironive publike.
Deputeti demokrat akuzon gjithashtu kryeministrin se ka krijuar kushtet për kriminalizimin e ekonomisë dhe pastrimin e parave në Shqipëri, duke theksuar se, sipas tij, përgjegjësit për këto zhvillime do të duhet të përballen me drejtësinë.
POSTIMI I PLOTE
Edi Rama ka deklaruar sot se: “Ndërkohë Auruba është bërë e vërtetë. Është nxjerrë në këtë fushën e algoritmit. Siç është bërë e vërtetë që unë jam konsumator kokaine.”.
NË FAKT “ARUBA” ËSHTË NJË E VËRTETË QË ULËRET DHE QË EDI RAMA NUK E FSHEH DOT ME BATUTA!
Të dhënat e dosjes së SPAK-ut nuk janë marrë nga fusha e algoritmit, por nga përgjimet zyrtare të autoriteteve ligjzbatuese belge!
Sipas SPAK-ut, nga këto përgjime ka rezultuar se: “Nga përmbledhja e dërguar nga autoritetet belge mësohen të dhëna të rëndësishme mbi takime dhe njohje ndërmjet personave nën hetim, takime këto të zhvilluara në Majorka, Gjermani, Aruba apo Belgjikë; të dhëna mbi takime të kryera nga ana e tyre me PËRFAQËSUES FUNKSIONARË TË LARTË SHTETËRORË TË SHTETIT SHQIPTAR në Aruba.
Përmendim këtu takimet e vëzhguara në janar-shkurt 2019. Sipas provave të pjesshme të paraqitura, këto takime duket se kanë të bëjnë me projekte pasurish të paluajtshme në Shqipëri, potencialisht të financuara me fonde të paligjshme, me mbështetjen e AUTORITETEVE POLITIKE.”
Fatkeqësia e Edi Ramës në këtë rast është se provat nuk janë algoritëm, por realitet! Sa do të përdridhet, ato janë aty: me video dhe foto!
Kriminalizimi i ekonomisë dhe shndërrimi i Shqipërisë në parajsën e pastrimit të parave të drogës janë vepër e tij. Herët a vonë do të mbajë përgjegjësi për këtë.
