Ndeshja e sotme mes Tiranës dhe Dinamo Batumi në kryeqytet nuk kaloi pa incidente të vogla sa i përket sigurisë dhe rendit në “Air Albania”.
Ndezja e fishekzjarrëve dhe hedhja e sendeve në fushë, bëri që herë pas herë të kërkohej nga spikeri i stadiumit që të ndalej një gjë e tillë sepse klubi do të vuante pasojat.
Por ajo që alarmoi stjuardët në impiant, ishte një “selfie”.
Një djalosh kërceu në fushë nga tribuna e mbështetësve të Tiranës për të bërë një foto, duke sjellë ndërhyrjen e stjuardëve. Ata e rrethuan menjëherë dhe e shoqëruan jashtë.
Por ndryshe nga sa ndodh në vende të tjera të botës ku tifozë të tillë largohen nga impianti, stjuardët në “Air Albania” e kthyen përsëri në tribunën nga e cila kishte kërcyer në terrenin e lojës.
