Gjykata e Elbasanit ka dënuar me 22 vite burg Arbër Paplekajn për vrasjen e Pjerin Xhuvanit në prillin e 2021, pak ditë para zgjedhjeve parlamentare.
Po ashtu, gjykata ka dhënë dënimin me një vit shërbim prove për Nikollaq Pallën dhe Albert Nushi, dy ish-zëvendësdrejtorë të policisë së Elbasanit në kohën kur ndodhi vrasja, për akuzën e shpërdorimit të detyrës. Ndërkohë, për 6 efektivët e policisë është dhënë dënimi me 16 muaj shërbim prove për të njëjtën akuzë.
Në pretencë, prokuroria kërkoi 25 vite burg për Arbën Paplekjan, dhe dy vite shërbim prove për dy ish-zv/drejtorët Albert Nushi dhe Nikollaq Palla. Tetë muaj shërbim prove janë kërkuar në pretencën e akuzës për 6 efektivë policie të tjerë të akuzuar.
Pas vendimit të gjykatës, avokatët e Paplekajt dhe ai i familjes Xhuvani paralajmëruan ankim të vendimit.
Ngjarja ndodhi vetëm pak ditë para zgjedhjeve të 25 prillit 2021. Pjerin Xhuvani mbeti i vrarë në Elbasan, pasi u qëllua me armë nga Arbër Paplekaj, ish-efektiv e RENEA-s dhe shoqëruesi i kreut të listës së Partisë Demokratike, Gazment Bardhi. Ai ishte pjesë e një grupi nga PD e asaj kohe për “mbrojtjen e votës”.
Nga ngjarja e 21 prillit, të plagosur mbetën edhe katër persona të tjerë, Emiljan Prenga, Pavlo Vuksani, Eltjon Bodinaku dhe Xhensila Sota, punonjëse e policisë. Paplekaj pranoi krimin dhe u vetëdorëzua në Repartin e Forcave RENEA në Tiranë, duke thënë se qëlloi për vetëmbrojtje pasi u qëllua më parë nga persona që, sipas tij, po blinin vota.
Në një deklaratë për mediat më 22 prilli 2021, ish-kryepolici Ardi Veliu nuk pranoi përgjegjësitë e policisë, ndërsa mohoi të ishin gjetur prova për shitblerje vote.
Ndërsa gjykata ka vlerësuar se mosveprimi i trupës policore në asnjë nga momentet e kësaj situate shkon deri aty sa në vendngjarje të përdoren armë.
Sipas hetimeve nga prokuroria, u gjetën 5 fletë me lista emrash dhe ID, 17 fletë formati, kopje kartash identiteti dhe pasaporta biometrike, 5 gjurmë kopjues dhe një formular patronazhi.
