Policia gjermane ka mësyrë banesën e një çifti në Solingen, ku ka gjetur armë zjarri. Forcat speciale (SEK) mësynë një apartament në Broßhauser Straße në Ohligs të martën në mëngjes dhe arrestuan një shqiptar dhe gruan e tij gjermane. Në banesë u gjetën edhe një numër armësh zjarri.
Dy të arrestuarit dyshohet se kanë qenë aktivë kriminalë në fusha të ndryshme në të kaluarën. Bashkëshorti 30-vjeçar shqiptar akuzohet për shkelje të ligjit për narkotikët, ndërsa bashkëshortja 30-vjeçare, shtetase gjermane, mësohet se ka përvetësuar para nga klientët si punonjëse e një institucioni financiar.
Zyra e prokurorit publik të Wuppertal, e cila ishte përgjegjëse për operacionin në Ohligs, fillimisht nuk njoftoi se cila kompani bankare ishte e përfshirë. Megjithatë, u raportua se shumat janë mjaft të konsiderueshme.
“Thuhet se janë disa qindra mijëra euro”, tha prokurori i lartë publik përgjegjës Wolf-Tilman Baumert më vonë.
Gjatë kontrollit në banesë, hetuesit gjetën bizhuteri me vlerë. Dhe kur u hap një kasafortë, u zbulua një sasi gjashtëshifrore parash. Sipas njohurive të mëparshme bëhet fjalë për para të përvetësuara nga 30-vjeçarja.
Shqiptari mësohet se ka vepruar në sasi të mëdha me lëndë narkotike. Gjatë kontrollit në banesë, efektivët sekuestruan tre armët e gjata të përmendura përveç sasive të vogla të lëndës narkotike. Policia kriminale ka konfiskuar edhe një Mercedes AMG të të dyshuarit.
