Partia Socialiste dhe Partia Demokratike kanë rënë dakort lidhur me arrestimin e ish-zv.kryeministrit, Arben Ahmetaj.
Raporti i paraqitur sot në Këshillin e Mandateve do të miratohet të hënën në një seancë të posaçme plenare që do të mbahet në orën 17:00. Opozita ka dorëzuar në Këshillin e Mandateve raportin me përfaqësinë e Gazmend Bardhit, lidhur me kërkesën e SPAK ndaj Kuvendit për heqjen e mandatit të ish-zv.kryeministrit Arben Ahmetajt.
Pas dorëzimit të raportit, Bardhi tha se 5 përfaqësuesit e opozitës rekomandojnë që Kuvendi të votojë pro dhënien e autorizimit për heqjen e mandatit të Ahmetajt, në mënyrë që hetimi i SPAK të jetë i plotë.
Bardhi: “5 deputetët e Këshillit për Imunitetin, përfaqësues të opozitës, i rekomandojnë seancës plenare të Kuvendit të Republikës së Shqipërisë të votojë, për miratimin e dhënies së autorizimit, të kërkuar me kërkesën nr. 9431 Prot., datë 07.07.2023 të Prokurorisë së Posaçme Kundër Korrupsionit dhe Krimit të Organizuar “Për dhënien e autorizimit për arrestimin/heqjen e lirisë, kontrollin personal dhe kontrollin e banesës së deputetit Arben Ahmetaj”, me qëllim për t’i hapur rrugë hetimit të plotë dhe të gjithanshëm në kuadër të procedimit penal nr. 277/1, të vitit 2022 për 3 veprat penale.”
