Policia e Shtetit ka bllokuar 10 varka dhe 1 traget në liqenin e Komanit si dhe ka gjobitur drejtuesit.
Në kuadër të operacionit policodr “Lundrim i Sigurt”, efektivët kanë kryer kontrolle në vendin ku ankorohen mjetet lundruese në Liqenin e Komant, ku kanë konstatuar 10 varka të cilat nuk i përmbushnin kriteret e sigurisë dhe nuk kishin dokumentacionet përkatëse.
Drejtuesit e varkave u gjobitën nga Policia me nga 10 mijë lekë të reja gjobë secili.
Në hyrje të liqenit, u konstatua një traget me mbishkrimin “Rozafa”, i cili nuk ishte hera e parë që kapet në cënim të ligjeve për lundrim dhe kriteret e sigurisë.
Gjithashtu, janë gjetur edhe 5 motorskafë, drejtuesit e të cilëve nuk kishin autorizim për të ushtruar veprimtari ekonomike. Ata nuk u lejuan të marrin pasagjerë në bord.
“Iniciohet plani operacional policor i koduar “Lundrim i sigurt”, për kontrollin ndaj mjeteve lundruese që operojnë për qëllime argëtimi dhe lundrimi. Plani operacional, nga Drejtoria e Përgjithshme e Policisë së Shtetit, me pjesëmarrjen e dhjetëra efektivëve të Drejtorisë Vendore për Kufirin dhe Migracionin dhe të Drejtorisë Vendore të Policisë, Shkodër, në bashkëpunim me FNSH Shkodër, Delta Forcën dhe me Drejtorinë e Përgjithshme Detare në Ministrinë e Infrastrukturës dhe Energjisë, për të ushtruar kontrolle në liqenin e Komanit dhe në lumin e Shalës. Objektivat, rritja e parametrave të sigurisë për qytetarët, vizitorët dhe pushuesit, si dhe parandalimi i incidenteve gjatë sezonit turistik.
Në nisje të këtij operacioni, në vendin ku ankorohen mjetet lundruese në liqenin e Komanit u konstatuan 13 varka artizanale që nuk përmbushnin kriteret e sigurisë dhe nuk ishin të pajisura me dokumentacionin përkatës.
Në vijim, në hyrje të liqenit të Komanit, u konstatua një traget me mbishkrimin “Rozafa”, për të cilin specialistët për Hetimin e Krimit Ekonomiko-Financiar kanë referuar materialet në Prokurori, pasi u konstatua për herë të dytë, në cenim të plotë të ligjeve për lundrim dhe të kritereve të sigurisë.
Gjithashtu, janë konstatuar edhe 5 mjete lundruese skafë, drejtuesit e të cilëve kishin autorizim për përdorim personal, por jo për të ushtruar veprimtari ekonomike si operator turistik. Drejtuesit e këtyre skafëve nuk u lejuan të merrnin pasagjerë në bord.
Nga kontrollet u konstatuan edhe 25 varka artizanale të bregëzuara në pjesë të ndryshme të liqenit të Komanit. Shërbimet e Policisë vijojnë verifikimet për të identifikuar pronarët e këtyre mjeteve, me qëllim kryerjen e veprimeve të mëtejshme për bllokimin e mjeteve lundruese që nuk përmbushin kushtet e sigurisë, për transportimin ditor, për qëllime turistike, të turistëve dhe vizitorëve.”– njofton policia.
Rreth 2 javë më parë, si rezultat i kontrolleve në liqenin e Komanit, Policia e Shkodrës bllokoi 1 traget dhe 10 varka artizanale. Drejtuesi i tragetit u procedua penalisht, ndërkaq drejtuesit e varkave u ndëshkuan me masë administrative 10 000 të rinj, secili.
