Sot në orën 16:00 ka nisur seanca e dytë e Këshillit të Mandateve lidhur me kërkesën e SPAK drejtuar Kuvendit për arrestimin e ish-zëvendëskryeministrit, Arben Ahmetaj i akuzuar për aferën e inceneratorëve.
Në mbledhjen e djeshme avokatët e ish-ministrit kanë bërë me dije se Arben Ahmetaj nuk ndodhej në Shqipëri, ndërsa sot ata kanë deklaruar se klienti i tyre ka ikur jashtë vendit për arsye familjare, por pa dhënë më shumë detaje.
Ka nisur me debate, Mbledhja e Këshillit të Mandateve, ku po shqyrtohet kërkesa e SPAK për autorizimin e arrestimit të Arben Ahmetaj.
Deputeti i Partisë Demokratike Gazment Bardhi, ai i cili u përplas me Kryetaren e Kuvendit në lidhje me mospërfshirjen në seancën plenare të ditës së nesërme të votimit për dhënien e autorizimit të prokurorisë për arrestimin e ish-zv/kryemninistrit.
Sipas deputetit të PD, maxhoranca po i jep kohë Ahmetaj që të fshihet duke penguar drejtësinë të veprojë. Bëhet me dije se nga ana e Kuvendit është kërkuar që seanca në Kuvend për Ahmetajn të mbahet të hënën në orën 17:00, por që ende nuk ka kaluar në votim.
Kujtojmë se Prokuroria e Posaçme ka kërkuar nga Kuvendi heqjen e imunitetit për Ahmetaj dhe arrestimin e tij. Ish-zëvendëskryeministri rezulton se është larguar nga Shqipëria para se kërkesa të dorëzohej në Parlament. Kreu i Prokurorisë së Posaçme Altin Dumani deklaroi në mbledhjen e mbajtur dje se të gjitha provat që janë mbledhur justifikojnë kërkesën për arrestimin e deputetit.
