Tragjedia në Vilë-Bashtovë, ku humbën jetë babai dhe dy djemtë e mitur teksa ishin duke u larë në det, ka sjellë revoltime të shumta në rrjet lidhur me mungesën e sigurisë në plazhe.
Së fundmi ngjarja është komentuar edhe nga kreu i Federatës së Vrojtuesve të Plazhit, Erdit Gega, i cili shprehet se, nëse do të kishte pasur vrojtues plazhi ngjarja mund të ishte parandaluar.
I ftuar në News 24, Gega u shpreh se vetë administratorët e plazhit ka raste që i largojnë vrojtuesit pasi nuk duan t’i paguajnë.
Ndër të tjera ai tregoi dhe mënyrat se si veprohet në rast të një rreziku.
Gega: “Nëse do kishte pasur vrojtues plazhi të mirëinformuar dhe të mirë trajnuar, ngjarja mund të ishte parandaluar. Roli i federatës është që të trajnojë dhe certifikojë vrojtuesit e plazhit. Të jenë të aftë fizikisht dhe për të ushtruar profesionin. Detyra e Federatës mbaron te verifikimi dhe vlerësimi. Kërkesa për vrojtues dhe trajnim të tyre vjen nga subjektet. Të rinj të cilët duan ta ushtrojnë këtë profesion vijnë pranë qendrave të Federatës, trajnohen, bëjnë provimin përfundimtar, që janë të aftë të ushtrojnë profesionin.
Edhe vetë vrojtuesit duhet ta pyesin përpara personin në rrezik, të përpiqen të komunikojnë. As plazhistët e tjerë nuk duhet të hyjnë në ujë për ndihmë pa një mjet shpëtues. Ka disa mënyra më pas që vrojtuesit të ndërhyjnë”.
