Pas kërkesës së SPAK drejtuar Kuvendit për arrestimin e ish-zëvendëskryeministrit Arben Ahmetaj, sot pasdite në orën 16:00 është planifikuar për t’u mbledhur Këshilli i Mandateve në Kryesinë e Kuvendit.
Kur kanë mbetur vetëm pak orë nga takimi, avokatët e ish-ministrit Arben Ahmetaj kërkojnë që mbledhja të shtyhet për ditën e nesërme. Shkak i kërkesës së tyre është bërë dosja voluminoze e SPAK.
“Të shtyhet për nesër”– thonë avokatët e Ahmetajt.
Prokuroria e Posaçme kundër korrupsionit në Shqipëri (SPAK) dorëzoi një ditë më parë në Kuvendin e Shqipërisë kërkesën për dhënien e autorizimit për arrestimin e ish-ministrit të Financave dhe deputetit aktual të Partisë Socialiste, Arben Ahmetaj.
Kërkesa mban datën 7 korrik dhe nënshkrimin e drejtuesit të SPAK, Altin Dumani. SPAK thekson se kërkon autorizim nga Kuvendi i Shqipërisë, për arrestimin ose heqjen e lirisë dhe ushtrimin e kontrollit personal dhe të banesës së deputetit. Arben Ahmetaj akuzohet për “Mosdeklarim apo fshehje të pasurive”, “Korrupsion pasiv” si dhe “Pastrim parash”.
