Gjatë debatit të ashpër të zhvilluar në mbledhjen e Këshillit të Mandateve mes opozitës dhe mazhorancës, edhe deputeti Gazment Bardhi, njësoj si kolegu i tij demokrat Ervin Salianji ka akuzuar deputeten socialiste Ermonela Felajn se e ka emrin në dosjen e SPAK për ish-zv.kryeministrin Arben Ahmetaj, për të cilin është kërkuar leja për arrestimin e tij.
Bardhi i është përgjigjur fyerjeve të Felajt duke i kujtuar se emri i saj është në dosjen e sjellë nga SPAK.
“Emri yt është në këtë dosje. Ti ke frikë sepse emri yt është në dosje. Lëri njerëzit të kuptojnë që ti njësoj si Ahmetaj ke qenë pro ndërtimit të inceneratorëve. Je në konflikt interesi!” u shpreh Bardhi në debat e sipër
“Mazhoranca ka frikë që shqiptarët të mësojnë të vërtetën për inceneratorët! Mazhoranca po ndihmon Ahmetaj që të arratiset dhe SPAK mos ta kapë atë!” – deklaroi më tej Bardhi.
Ndërkohë më herët edhe Salianji i është drejtuar Felajt duke i thënë se është në konflikt interesi dhe ndaj e kërkon mbledhjen me dyer të mbyllura.
“Je e përfshirë njësoj dhe je pjesë e dosjes dhe prandaj e kërkon të mbyllur mbledhjen”, është shprehur ai.
Mbledhja u ndërpre për 5 minuta pas debateve. Kujtojmë se vetë Ahmetaj nuk merr pjesë në mbledhje, por po përfaqësohet nga avokatët e tij.
