Vjen reagimi i parë nga opozita menjëherë pas kërkesës së SPAK drejtuar Kuvendit për t’i dhënë “dritën jeshile” arrestimit të ish-zv/kryeministrit Arben Ahmetajt, një nga njerëzit të “besuar” dhe shumë të afërt të kryeministrit Edi Rama.
Gjatë një postimi në rrjetet sociale, Gazment Bardhi kërkon që në mënyrë urgjente të mblidhet sot Këshilli i Mandateve që t’i japë sa më shpejt “OK” arrestimit të Ahmetajt duke e vendosur para drejtësisë.
Gjithashtu Bardhi thekson se hetimet për aferën e inceneratorëve duket të shkojë deri tek “koka” e Edi Ramës për të cilin tha se ka formuar një qeveri me korrupsion monstruoz.
“Kërkesa për të çuar Arben Ahmetaj para drejtësisë për aferën korruptive të incineratorëve është një veprim i drejtë, por i vonuar dhe i paplotë. SPAK duhet t’i shkojë deri në fund kësaj afere, duke bërë një hetim të plotë dhe të gjithëanshëm deri tek kreu i aferës korruptive, Edi Rama. Së bashku, ata kanë kryer disa nga veprat më monstruoze të korrupsionit qeveritar në 3 dekadat e fundit. I kërkoj kryetares së Kuvendit të mbledhë pa vonesë sot Këshillin e Mandatave. SPAK-ut i duhet dhënë menjëherë akses për kontrollin personal dhe të banesës së ish zëvendëskryeministrit”, shkruan Bardhi.
