Presidenti ukrainas Volodymyr Zelensky falënderoi të premten homologun e tij amerikan Joe Biden për ndihmën ushtarake në mbrojtjen e Ukrainës, pas angazhimit të SHBA-së për furnizimin me municione thërrmuese.
“Një ndihmë ushtarake e nevojshme, shumë e madhe dhe në kohë”, shkroi Zelensky në rrjetet sociale, duke falënderuar Biden dhe amerikanët për këto “masa vendimtare”.
“Rritja e aftësive mbrojtëse të Ukrainës do të sjellë mjete të reja për të çliruar territorin tonë dhe për të na sjellë më pranë paqes”, shtoi ai.
Nga ana e tij, presidenti i SHBA-së Joe Biden tha të premten mbrëma tha se vendimi i tij për t’i ofruar Ukrainës municione thërrmuese ishte një vendim i vështirë, por ai beson se Kievit i duhen armët në mënyrë që Rusia të mos mund të ndalojë kundërsulmin ukrainas.
“Ata po përpiqen të kalojnë nëpër ato llogore dhe të ndalojnë ato tanke,” tha Biden në një intervistë për CNN. “Nuk ishte një vendim i lehtë”.
Siç njoftoi Shtëpia e Bardhë më herët, Shtetet e Bashkuara do të furnizojnë Ukrainën me municione thërrmuese.
“Është një vendim i vështirë. Ne e shtymë atë” për disa kohë, u tha gazetarëve këshilltari për sigurinë kombëtare të Shtëpisë së Bardhë, Jake Sullivan, duke shtuar se ishte “gjëja e duhur për të bërë”.
Ai tha gjithashtu se presidenti Joe Biden e mori vendimin në konsultim me aleatët dhe pasi administrata e tij “rekomandoi unanimisht” propozimin.
