Është zbardhur dëshmia e 37-vjeçarit Valter Bami, i njohur ndryshe si “i forti” i Niklës, i cili u arrestua një ditë më parë nga Policia e Tiranës nën akuzën për veprën penale “Mbajtja pa leje dhe prodhimi i armëve, armëve shpërthyese dhe i municionit”.
Bami u shoqërua si i dyshuar pas atentatit të Larushkë, ku u vra Ramazan Sino dhe u plagosën dy djemtë e mitur të Gentjan Bejtjas dhe bazuar në përgjigjen e aktit të ekspertimit kimik, ka rezultuar se në dorën e majtë të 37-vjeçarit, janë konstatuar faktorë plotësues të qitjes me armë zjarri.
Burime bëjnë me dije se edhe një herë tjetër para grupit hetimor ai e ka mohuar përfshirjen në atentatin e Larushkës, ku shënjestër ishte Gentjan Bejtja, dikur miq dhe sot armiq të njëri-tjetrit.
Valter Bami ka pretenduar në takimin me avokatin e tij Ilir Murati se gjurmët e barutit në duart e tij janë për shkak se ai bën qitje rregullisht me një armë sportive që e ka në banese me leje. Po ashtu mësohet se ai ka deklaruar madje se 29-vjeçarin që u vra Ramazan Sinon e kishte të afërm dhe ndjen keqardhje për ngjarjen e ndodhur.
“Ndjej keqardhje për humbjen e jetës së Ramazan Sinos që e kam të kushëri pasi nëna e Ramazanit dhe nëna ime janë vajza tezesh. Do ta dorëzoj lejen e armës që zotëroj dhe do kërkoj lirimin”, mësohet të ketë thënë i akuzuari.
Valter Bami, nuk është një emër i panjohur për policinë, pasi njihet për një sërë rekordesh kriminale.
