Nga Basir Çollaku
Po të kishit dëgjuar, vlerësuar e mbështetur Emiljano Nuhun !?!
Për Rrajat, Bamët, Hakët, Shullazin e grupin e tij, politikanë, deputetë, bashkiakë e pushtetarë të lidhur me njerëz me rekorde të shumta kriminale, për aktivitetin e trafikut të kanabis, heroinës, kokainës, gjobëvëniet, pengmarrjet, atentatet me tritol, përfshirjet në vrasje, pastrimin e parave e mjaft vepra të rënda penale, Emiljano Nuhu, ish-oficeri i policisë, agjenti i infiltruar në shumë operacione të suksesshme, kishte bërë kallëzime konkrete, në Policinë e Shtetit, tek eprorët, prokurorët, gjyqtarët. Por… gjithnjë një por, shëmton të vërtetën dhe i mundëson krimit territor.
Ky ishte krimpushteti ku u mund shteti.
“Rajoni 13”, është një film për ngjarje të zhvilluara në Paris, ku policia nuk hynte dot dhe bandat, sipas takatit, hierarkisë së fuqisë së organizimit, sundonin mes drogës, armëve e gjithë sojit të veprave penale. Sot, Shqipëria është thuajse e gjitha një “Rajon 13” ku Policia ka mundësinë të ketë godinën e saj dhe me raste kur mullari merr flake, del e bën arrestime. Fillimisht i shoqëron, më pas i lë të lirë dhe kujtohet t’i shpallë në kërkim, kur ata janë zhdukur me leje. Me 3 korrik 2023 qëllojnë mbi banesën e një biznesmeni, Bejtja, ku vritet Ramazan Sina dhe plumbat nuk kursejnë as të miturit, 10 e 13 vjeç, njeri prej të cilëve ndodhet në gjendje të rëndë. Pa kaluar pak ditë, një sulm agresiv i dhunshëm me armë e rrahje nga familja Rraja, e cila masakron denoncuesit me mbiemër Maja për guroren, sepse po u shembte banesën. Polica e sehirit veproi pas publikimit të videos së masakrës, thua priste xhevap nga videoparësi Edi Rama e më pas të konkludonin me porosi të shtatnaltgjatësisë së tij. Ai, kryeministri është bashkëautor në këto ngjarje. Më në fund janë shoqëruar sipas policisë 8 autorë të dyshuar, janë arrestuar katër e tre në kërkim. Xhelal e Flamur Rraja, vëllezërit e deputetit Rrahman Rraja, por edhe të tjerë të kësaj familjeje, I. Rr dhe K. RR, sipas njoftimit zyrtar, janë pjesë e ekipit prej afro 10 personash, aktorë të përfshirë në ngjarjen e rëndë, njëri prej të cilëve me armë në dorë drejtuar mbi viktimën e shtrirë nga goditjet e shkopinjve të bejsbollit nga çeta e dhunës. Rexhep Rraja, në korrik të vitit 2018, i përfshirë në ngjarjen e dhunës ndaj vajzës Xh.M, nga padia e së cilës u arrestua, duke lënë të pahetuar drejtësisht akuzën e rëndë të oficerit të policisë Emiljano Nuhu, për vëllanë e deputetit Xhelal Rrajën, deputetin Taulant Balla, kryebashkiakun e Krujës, Artur Bushi, të pranishëm në zyrën e komisariatit të Fushë-Krujës, ku i është vënë arma në kokë për të ndryshuar rrjedhën e hetimeve, gjë që agjenti e refuzoi radikalisht dhe kjo i solli ndëshkimin e paligjshëm qeveritar. Redjan e Ramazan Rraja kanë qenë të akuzuar në komisariatin nr.6 në Tiranë në 2018-ën nga Emiljano Nuhu për kanosjet e tyre, por prokuroria zgjidhte gjithnjë anën e deputetit. Ndërkohë Redjan Rraja më pas është arrestuar për akuzën e vrasjes e plagosjes ndaj prokurorit, Arjan Ndoji, atentat në mbikalimin e Shkozetit, ku humbi jetën drejtuesi i mjetit. Kjo është zonë e ashpër e pushtuar nga bandat, territor me ngjarje të rënda, apo me streha autorësh për krime të mëdha. Nëse prokuroria, gjykata, drejtësia e policia, do të kishin dëgjuar dhe mbështetur Emiljano Nuhun, kësaj zone do i kishin munguar shumë ngjarje, vrasje, grabitje, trafiqe etj. Ai ishte oficer kurajoz, shumë i trajnuar, drejtuesi i grupit të vogël të agjentëve të infiltruar. Ai denoncoi e kallëzoi me shkrim. Gjurmët janë në sistem, dosjet janë aty, por sistemin e kanë horrnaja e pushtetit e krimit së bashku. Denoncoi edhe Taulant Ballën për marrëdhëniet me bandat e Elbasanit, për përgjimet parandaluese të bisedave mes tyre, ku dora e ministrave e deputetëve, i rrëmbente nga arkivat dhe asgjësonte. Nga jashtë Shqipërisë, Emiljano Nuhu, agjenti të cilit duhet t’i jemi mirënjohës, po dëshmon të vërtetën e punës së tij, denoncimeve të tij. Por, bandat, qeveria e deputetët, u bënë bashkë kundër oficerit. Sot po hanë gjellën kriminale të gatuar. Nesër, ata deputetë e pushtetarë, do të jenë vakti i tyre, nëse guxojnë sjellje kundër dhe ndryshe.